Partia Demokratike, përmes zëdhënëses së saj për Antikorrupsionin, Genta Vangjeli, ka akuzuar Presidencën e Republikës dhe Shkollën e Magjistraturës për përfshirje në favor të Partisë Socialiste (PS) gjatë procesit zgjedhor të 11 majit.
Në deklaratën e saj, Vangjeli u shpreh se Presidenca ka vënë në dispozicion të partisë-shtet kabinetin e Presidentit të Republikës. Si argument, ajo solli faktin se Grupi Parlamentar i PD-së i ka drejtuar një kërkesë Presidentit për të mos ndërhyrë në procesin zgjedhor dhe për të ruajtur neutralitetin politik. Kjo kërkesë lidhet me emrin e Ilirjan Rusmalit, pjesë e kabinetit të Presidentit Begaj, i cili mban gjithashtu detyrën e anëtarit të Komisionit të Ankimimeve dhe Sanksioneve (KAS), duke krijuar sipas PD-së shkelje ligjore dhe cenim të parimit të neutralitetit politik.
PD-ja kishte kërkuar përjashtimin e Rusmalit nga shqyrtimi i kërkesës ankimore, duke argumentuar sjelljen e tij të njëanshme në favor të subjektit zgjedhor ‘Partia Demokratike – Aleanca për Shqipërinë Madhështore’. Sipas PD-së, sjellja e Rusmalit në cilësinë e anëtarit të KAS-it ishte haptazi kundër palës ankuese, duke krijuar arsye serioze për njëanshmëri, në mbështetje të nenit 42, pika 2, të Kushtetutës, nenit 6, pika 1, të Konventës Evropiane për të Drejtat e Njeriut, nenit 30 të Kodit të Procedurave Administrative, si dhe nenit 135 të Kodit Zgjedhor. Kërkesa e PD-së për përjashtimin e Rusmalit u rrëzua nga KAS.
Në vijim të akuzave, Vangjeli përmendi Shkollën e Magjistraturës, duke pohuar se ka vënë në dispozicion të Partisë Socialiste studentët e saj. Konkretisht, ajo përmendi kandidaten për gjyqtare Shila Vital Ballhysa, e cila sipas listës përfundimtare të Shkollës së Magjistraturës rezulton të jetë njëkohësisht përfaqësuese e PS-së në KQZ si eksperte e komisionit të reformës zgjedhore për PS-në.
Partia Demokratike ka kërkuar me urgjencë nga Presidenti i Republikës dhe Shkolla e Magjistraturës të distancohen me veprime konkrete nga këto që i quan paligjshmëri. PD paralajmëron se mosveprimi i tyre do të dëshmojë përzierjen e PS-së me strukturat që duhet të jenë të paanshme në vlerësimin e procesit zgjedhor, duke sjellë si pasojë farsa elektorale si ajo e 11 majit 2025, e përshkruar, sipas tyre, në Raportin Paraprak të OSBE/ODIHR.
Discussion about this post