Shërbimi i laboratorëve mjekësorë është kontrata e katërt e partneritetit publik-privat në sektorin e shëndetësisë dhe parashikohej në fillim t’u kushtonte taksapaguesve rreth 13 miliardë lekë ose 114 milionë dollarë në 10 vitet e operimit.
Kontrata u fitua nga konsorciumi “Labopharma” me seli në Tiranë, “Exalab” me seli në Francë dhe kompania guackë “AB Laboratory Solution” B.V e regjistruar në Hagë të Holandës dhe po zbatohet prej vitit 2020 nga kompania koncesionare “Laboratory Networks”.
Por, në fakt ky koncesionar po përfiton më shumë para nga se është parashikuar , edhe pse në çdo vit ka ulur numrin e analizave që kryen. Të gjithë këtë vorbull e shkakton biznesmeni greko-shqiptar Jani Karathano, i cili është pronari i firmës “AB Laboratory Solutions BV”.
Çdo vit ai po rrëmben më shumë fonde nga Sektori i Shëndetësisë, me urdhër të ministres Ogerta Manastirliu. Këtë e tregon raporti vjetor i Fondit të Sigurimit të Detyrueshëm të Kujdesit Shëndetësor (FSDKSH), i cili tregon se në vitin e shkuar numri i ekzaminimeve laboratorike vitin e kaluar ishte 5,372,603 me rënie 17 % në krahasim me vitin 2021, por sakaq pagesat buxhetore u rritën së tepërmi vitin e kaluar ndaj PPP-së që ofron ketë shërbim.
Ndërkohë, FSDKSH i pagoi vitin e kaluar koncesionin e laboratorit me 1,6 miliardë lekë nga 1,1 miliardë lekë në vitin 2021 me një rritje 46%.
Në fillim të vitit 2022, në projektbuxhet financimi i këtij shërbimi u parashikua me 1,360,130,000 lekë, por me një akt normativ ne mes te vitit qeveria e çoi fondin për PPP-në e laboratorit në mbi 1,6 miliardë lekë, shumë e cila u disbursua totalisht. Kështu Jani Karathanos iu bë një dhuratë nga ministrja e Shëndetësisë, Ogerta Manastirliu dhe drejtorja e Fondit, Albana Çela rreth 500 milionë lekë më shumë.
Sipas të dhënave të publikuara në raport evidentohet se, vlera e financimeve për koncesionin e laboratorit vetëm këtë vit u rrit me 2.4 milionë euro.
Kostot më të mëdha i ka “Qendra Spitalore Nënë Tereza”. Nga buxheti vjetor i QSUT-së prej mbi 8 miliardë lekë, 764 milionë lekë ose 9% e totalit të financimit shkojnë për koncesionin e laboratorit.
“Nga krahasimi i periudhës Janar-Dhjetor të vitit 2021 me periudhën Janar-Dhjetor të vitit 2022 rezulton se janë realizuar 121,970 ekzaminime më pak për vitin 2021. – Nga krahasimi i periudhës Janar-Dhjetor të vitit 2020 me periudhën Janar-Dhjetor të vitit 2022 rezulton se janë realizuar 286,796 ekzaminime më pak në vitin 2020”, thuhet në raport.
Kontrata PPP e laboratorëve nisi në vitin 2019 dhe përfundon në vitin 2028 më një shumë financimi 13 miliardë lekë pa TVSH. Sigurisht, nëse ecën me këto ritme pritet ta tejkalojë fondin e parashikuar.
Theksojmë se qysh nga dhënia me koncesion e laboratorëve janë ndërruar 6 drejtorë në krye të Fondit Sigurimit të Detyrueshëm të Kujdesit Shëndetësor, ndërsa njëri prej tyre është kallëzuar në prokurori nga Kontrolli i Lartë i Shtetit.
Vjedhjet në FSDKSH
Znj. Albana Çela në detyrën e Drejtores së Përgjithshme të komanduar të Fondit të Sigurimit të Detyrueshëm të Kujdesit Shëndetësor më 3 dhjetor 2020, duke zëvendësuar Eliza Berziun e cila qëndroi vetëm 3 muaj në post.
Ajo ka zëvendësuar Rudina Degjonin. Elisa Berziu, e cila ka mbajtur pozicionin e koordinatores së Platformës se Bashkëqeverisjes pranë kryeministrit Rama, ishte drejtoresha e 10 e FSDKSH gjatë pesë viteve. Në vitin 2015 u largua Astrit Beci, i cili ishte emëruar në krye të Fondit të Sigurimit të Detyrueshëm Shëndetësor, në vitin 2013.
Në vend të Astrit Becit u emëruar Milva Ekonomi, e cila vinte jashtë fushës së mjekësisë. Ekonomi u emëruar në qershor të vitit 2015 dhe u larguar në dhjetor të po atij vitit. Në 29 dhjetor të 2015, Këshilli Administrativ i FSDKSH, emëroi në krye të FSDKSH, Vjollca Brahon, eksperte kontabël, ndërsa ishte pjesë e Partisë për Drejtësi Integrim dhe Unitet. Pas largimit të Brahos, në vend të saj u emërua Erion Manohasa në datën 21 tetor 2016.
Manohasa u pezullua dhe më pas u shkarkuar nga detyra në prill të 2017, ndërsa u akuza për shpërdorim detyre.
Më pas Manohasa u emëruar në krye të Drejtorisë së Integrimit dhe Projekteve në Institutin e Statistikave, pasi çështja e tij u pushua. Ai dha dorëheqjen pas 24 orësh nga ky post. Ndërsa në krye të FSDKSH vijonin lëvizjet. Në vend të Erion Manohasa u emëruar Alketa Hila, e cila qëndroi në detyrë deri në maj të 2017.
Në vend të saj u emërua Eduard Ahmeti, i cili u largua në shtator të 2018. Ahmeti më vonë u emëruar Drejtor i Përgjithshëm në ministrinë e Infrastrukturës dhe Energjetikës. Në vend të tij, në shtator 2018, u emërua drejtore e Përgjithshme e Fondit të Sigurimit të Detyrueshëm Shëndetësor (FSDKSH) Anila Denaj. Zonja Denaj qëndroi vetëm disa muaj në këtë detyrë pasi janar të 2019 u emërua ministre e Financave dhe Ekonomisë.
Në vend të Denajt u emërua Adela Xhemali, e cila më pas u zëvendësua nga Rudina Degjoni, e cila dha dorëheqjen dhe u zëvendësua me Elisa Berziu. Duket qartë se vorbulla e lëvizjeve në krye të institucionit shkurtonte kohën e qëndrimit në detyrë, sa më tepër Karathano forconte lidhjet me ministren Manastirliu dhe kryeministrin Rama. Forcimi i miqësisë kërkon më tepër fonde për të ushqyer koncesionin dhe korrupsionin!
Lexo edhe: Koncesionari i Manastirliut merr 670 MLN lekë pa garë nga spitali i Erdoganit në Fier
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post