Komisioni i Ankimimeve dhe Sanksioneve rrëzoi sot një ankesë të Partisë Demokratike për të përjashtuar anëtarin e kësaj trupe, Ilirjan Rusmajli nga shqyrtimet e kërkesave të saj për pavlefshmërinë e zgjedhjeve.
“KAS pasi shqyrtoi kërkesën e paraqitur nga pala ankuese e rrëzoi këtë pasi nuk jemi në kushtet e parashikuara nga neni 130 i kodës së procedurës administrative”, tha relatori i çështjes, Ervin Lako.
Çfarë ndodhi në seancën në KAS?
Opozita kërkoi përjashtimin e anëtarit të Komisionit të Ankimimeve dhe Sanksioneve, Ilirjan Rusmajli nga shqyrtimi i kërkesave të saj për pavlefshmërinë e zgjedhjeve.
Argumenti i përfaqësuesit të Partisë Demokratike, Marash Logu, në Komisionin Qendror të Zgjedhjeve ishte se kërkojnë një proces të “paanshëm”, por Rusmajli është këshilltar i Presidentit Bajram Begaj.
“Ne i kemi kërkuar Presidentit të Republikës që të heqë dorë nga procesi zgjedhor përmes kabinetit të tij. Pastaj se çfarë bën Presidenti i Republikës është puna e tij. Do të vazhdojë ai të shkelë Kushtetutën le të vazhdojë ta bëjë. Thënë këtë gjë nuk e pengon aspak kërkesën që kemi në këtë proces kur ne me të drejtë kërkojmë që të zhvillohet proces i rregullt ligjor, ku një prej elementëve kryesorë është paanshmëria”, tha Logu.
PD-ja do të vijojë të kërkojë përjashtimin e Rusmajlit për të gjitha kërkesat ankimore të saj.
Discussion about this post