Edhe njëherë Shefqet Kastrati është më i fortë se shteti dhe pushteti është gati të bëjë çdo gjë që të mos e “mërzisë’ biznesmenin. Ajo që vihet re kohët e fundit është se, sa më shumë rrit Bordi i Transparencës çmimet e karburanteve, më shumë tenderë për naftë i jep Veliaj kompanisë Kastrati. Këtë herë Kastrati ka përfituar tenderin 32 milionë lekë me objekt blerje benzine, të hapur nga Bashkia Tiranë për të furnizuar Drejtorinë e Përgjithshme e Rrugëve dhe Ndriçimit Publik Tiranë. Kjo ka qenë një garë mes “peshkaqenëve” të tenderëve, por Veliaj zgjodhi fitues oligarkun më të madh Kastratin.
Në dokumentin e tenderit bëhet me dije se, në garë kanë marrë pjesë si bashkim shoqërish kompanitë A&Tsh.a & 2A2F – L OIL sh.p.k & , të cilat drejtohen nga burri i Ina Zhupës, Fabian Goçi, sëbashku me kompaninë O L S I sh.p.k të oligarkut Agron Bulku, tashmë të njohur për aferat korruptive në prokurimet publike. Përballë tyre ka garuar i vetëm Kastrati.
Nuk e dimë se cila është lidhja e veçantë me qeverinë, por edhe pse gruaja e tij është një nga zërat më kritikë ndaj mazhorancës, Fabian Goçi, ka përpirë disa tenderë pa garë, sidomos nga Bashkia Tiranë. Por, këtë herë në lojë ka hyrë Kastrati dhe të gjitha këto tregojnë se askush nuk mund të fitojë përballë tij, të paktën në çdo garë që ai ka marrë pjesë ka dalë fitues, në shumicën e rasteve edhe duke shkelur rregullat bazë të procedurave tenderuese.
Skema abuzuese
Në këtë tender Veliaj është mundur të justifikojë trofeun që i ka dhënë Kastratit. Kështu, në një pikë në dokumentet e tenderit përcaktohet se Kastrati ka paraqitur ofertën përmes të cilës norma e fitimit është 14.9 lekë për litër, ndërsa kompania tjetër ka paraqitur një ofertë me normë fitimi me 18 lekë për litër. Pra, Veliaj po kërkon të na mbushë mendjen se Kastrati ka dhënë ofertën më të lirë. Por, tashmë të gjithë po jetojmë këtë realitet me çmimet stratosferike dhe një llogari e thjeshtë na bën të kuptojmë se këto rreshta në tender po kërkojnë të na hedhin “hi syve”. Pasi vlera e shitjes së naftës do të bëhet edhe duke u bazuar në luhatjet e çmimit të tregut.
E pra tregu në këto muaj i ndryshon çmimet çdo ditë dhe kjo me urdhër të Bordit të Transparencës, që më së shumti do të konsiderohej si zyrë shtypi e Kastratit. Me pak fjalë vlerat dhe kushtet e kontratës për shit-blerjen e benzinës në këtë rast nuk kanë vlerë, pasi ato do të ndryshojnë rrugës sipas dëshirës së Shefqet Kastratit. Kujtojmë se, që nga viti 2014 tenderët për furnizimin e Drejtorisë së Rrugëve dhe Ndriçimi Publik i ka fituar Kastrati. Është e kuptueshme që në tenderin e radhës do ta fitojë sërish ai, por e gjithë kleçka është tek ndryshimi i vlerës së fitimit dhe fondit limit.
Discussion about this post