Bashkia Tiranë i ka bërë lekët “rrush e kumbulla” për gazoil, benzinë e gazë këtë muaj, ndërkohë që qytetarëve iu kërkon të kursejnë. Pak ditë më parë Gijotina.com ka denoncuar se si Erion Veliaj shpenzon 131 milionë lekë për blerje gazi, përmes një tenderi në shkelje të ligjit. Pikërisht në kohën që vendi është në krizë, Veliaj gjen të bëjë një sërë tenderësh për të blerë këto produkte, çmimet e të cilave kanë arritur në qiell. E si duke u justifikuar nga kjo kryebashkiaku shpenzon me miliona lekë, duke favorizuar kompanitë mike dhe sigurisht një pjesë të mirë e fut në xhepin e tij.
Këtë herë Veliaj ka vendosur të shpenzojë 411 milionë lekë për blerje gazoili. Konkretisht bëhet fjalë për tenderin REF-21518-03-09-2022, i cili nga Openprocurement është klasifikuar si një tender shumë problematik dhe abuzues. Kjo për shkakun se kanë paraqitur ofertë dy kompani A&T” sh.a & ”2A2F – L OIL” sh.p.k, si dhe bashkimi i kompanive “KASTRATI” sh.p.k & “RESULI – ER” sh.a. Ku edhe pse kompania e parë ka paraqitur një ofertë më të ulët 390 milionë lekë, Veliaj e ka refuzuar duke lënë në garë vetëm Kastratin. Kjo përbën shkelje pasi gara nuk mund të vazhdonte vetëm me një ofertë, aq më keq që Kastrati ka paraqitur ofertë më të lartë, 400 milionë lekë. Pra, gati 99% sa fondi limit, ndërsa ligji kërkon që të pranohet oferta më e vogël.
Por, si duket Veliaj është i pasionuar pas shpenzimeve marramendëse, pasi për favoret që bënë në këtë aferë merr edhe vetë një pjesë. Për këtë arsye ky tender ka risk të lartë për korrupsion dhe cenim të konkurrencës.
Kastrati lundron në tendera
Sikur e cekëm pak më lartë Kastrati ka marrë disa tendera nga Veliaj gjatë këtij muaji dhe të gjithë pa garë e në shkelje të ligjit. Fillimisht ai ka marrë tenderin 131 milionë lekë për të furnizuar Veliajn me gazë, tashmë kryebashkiaku po i jep 411 milionë lekë për furnizimin me naftë dhe po në këtë projekt është përcaktuar një tjetër tender për lotin 3 për blerje benzine, ku Kastrati merr 60 milionë lekë.
Ndërkohë, dy javë më parë Gijotina.com ka denoncuar se Kastrati fitoi dy tendera pa garë për karburantet me vlerë 721 mijë euro nga Agjencia e Blerjeve të Përqendruara e cila është në varësi të Ministrisë së Brendshme që drejtohet nga Bledi Çuçi. Po gjatë këtij muaji Bashkia Durrës i ka dhënë një tender 162 milionë lekë pa garë Kastratit për blerje naftë dhe fill pas saj i fali një tender Bashkia Shijak. E pra sikur duket qytetarët janë zhytur në krizë, ndërsa shtetit po “lahet” me naftë, në këtë rast Kastrati “lahet” me lekë./ E.H/Gijotina.com
Discussion about this post