Shteti i Katarit ka dënuar me ashpërsi sulmin izraelit që goditi ndërtesa banimi në kryeqytetin Doha, ku ndodheshin disa anëtarë të Byrosë Politike të Hamasit.
Katari e ka quajtur sulmin izraelit ndaj selisë së Hamasit në Doha “frikacak”.
Në një deklaratë zyrtare të shpërndarë në rrjetin social X, zëdhënësi i Ministrisë së Jashtme të Katarit, Majed Al Ansari, e cilësoi këtë akt si një “sulm kriminal të turpshëm” dhe një shkelje flagrante të të gjitha ligjeve dhe normave ndërkombëtare.
Al Ansari theksoi se sulmi përbën një kërcënim serioz për sigurinë dhe jetën e qytetarëve të Katarit, si dhe të rezidentëve të huaj në vend.
Ai konfirmoi se forcat e sigurisë, mbrojtja civile dhe autoritetet përkatëse reaguan menjëherë për të menaxhuar pasojat dhe për të garantuar sigurinë e banorëve dhe zonave përreth.
“Katari nuk do të tolerojë sjelljen e papërgjegjshme të Izraelit, as cenimin e sigurisë dhe sovranitetit të tij. Ky akt përbën një rrezik të madh për stabilitetin rajonal”, thuhet në deklaratë.
Autoritetet e Katarit kanë nisur hetime në nivelin më të lartë dhe kanë paralajmëruar se detaje të tjera mbi incidentin do të bëhen publike sapo të jenë të disponueshme.
“Është një shkelje flagrante e të gjithë ligjit ndërkombëtar”, thuhet në një deklaratë qeveritare të transmetuar nga Al Jazeera TV. Sipas burimit, qeveria e Katarit ka hapur një hetim “të menaxhuar nga nivelet më të larta” të institucioneve të vendit. Zëdhënësi i Ministrisë së Jashtme të Katarit, Majed Al Ansari, e dënoi sulmin “në termat më të forta të mundshme”, duke deklaruar se ai kishte në shënjestër një ndërtesë banimi “ku banojnë disa anëtarë të byrosë politike të Hamasit në kryeqytetin e Katarit, Doha”. Sulmi përbën një “shkelje flagrante” të ligjit ndërkombëtar dhe një “kërcënim të rëndë” për popullin e Katarit, shtoi ai. “Shteti i Katarit e dënon fuqimisht këtë sulm dhe pohon se nuk do ta tolerojë këtë sjellje të pamatur nga Izraeli, as ndërhyrjen e vazhdueshme në sigurinë e rajonit, as ndonjë veprim që synon sigurinë dhe sovranitetin e tij”, përfundoi deklarata.
Discussion about this post