Java e 10-të i shkoi përshtat Elbasanit. Ngecën të gjitha ekipet që e rrethonin, duke i dhënë komoditet në vendin e dytë dhe afruar me kreun. Ky “asist” i vjen në prag të përballjes më të rëndësishme të kësaj faze, asaj me Bylisin. Ndeshjet e luajtura të hënën ofruan jo pak surpriza. Ndalesa e Bylisit ishte një ndër to. Pas 6 fitoresh radhazi, stopuan me Besën.
Në fakt ky është vetëm barazimi i dytë për ballshiotët, që humbjen vazhdojnë të mos e njohin dhe kreun e kanë marrë me “tapi”. Shumë e ngjeshur po bëhet renditja në pjesën e poshtme. Nëse Luzi e ka nisur rrugën drejt rënies, pjesa tjetër po “luftojnë” me njëra-tjetrën për të fituar terren dhe larguar zonës së kuqe. Po t’i hedhësh një vështrim tabelës kupton që rrezikojnë ekipet që janë nga vendi i 6-të e deri tek i 11-ti. Pati ritëm, blofe, barazime, nerva dhe panik në këtë “xhiro”, por edhe ankesa për… gjykimin. Ndodhi ajo që pakkush e priste.
Besa ndali Bylisin dhe pikërisht në “Adush Muçaj”. Ishte një përballje e pazakontë, pasi skuadrat garuan se kush gabonte më shumë në finalizim. Kulmi arriti në të 51-ën kur Flamur Ruçi shpërdoroi një penallti. Gjeti vetëm shtyllën dhe gjithçka u mbyll 0-0. Elbasani nuk mund të falte. U fut me ide të qartë në fushën e Luzit dhe bëri “diktat”. Për 17 minuta e panë veten në avantazh të tre golave falë Leo Melos, Bedri Grecës dhe Edon Hasanit. Pas pushimit pati një reagim të luznjakëve më Patrik Trenin dhe Serxhio Xhikën. Por vetëm kaq, pasi një tjetër rrjetë e Melos shoi çdo shpresë dhe vulosi “pokerin”.
Edhe Vora nuk mori më shumë se një pikë me Lushnjën. Ishin verdhejeshilët që gjetën dy herë avantazhin me Paolo Kasmollarin dhe Xhjems Ajinde, por Jasmin Raboshta me Ariel Peraltën kthyen baraspeshën. Debutim të tillë Klodian Arbëri nuk e kishte menduar. Mirë nuk shkoi ndeshja e parë as për një tjetër trajner, Febron Ziun e Tomorit. Në Berat festoi Burreli, madje edhe pas ankthit që përjetuan prej Florenc Farrukut. Sulmuesi ra pa ndjenja pas një përplasje dhe u përmend vetëm në spital.
Goli i fitores erdhi prej zëvendësuesit të tij, Namdi Justin Naza. Super ishte Flamurtari. “Ultimatumi” që i dha Sinan Idrizi dha efekt. Një rrjetë e Lancinet Sidibe me kokë dha avantazhin, përtej dyshimeve për një “off side”. Korabi nuk është më aq i fortë më shtëpi dhe këtë e tregoi me vlonjatët. Në Fushë-Krujë nisi me vrull loja. Zajsar Arapi krijoi idenë se Kastrioti do të shkonte drejt kthesës me atë gol pas 3 minutash lojë, por mendoi Xhovalin Trifoni që të shmangte humbjen e dytë radhazi për Apoloninë. Barazoi në të 30-ën dhe kështu u mbyll e gjitha sfida.
Discussion about this post