Policia në Durrës njofton se katër anëtarë të një familjeje kanë rrezikuar të mbyten në det.
Sipas efektivëve, mjeti lundrues ku ata ndodheshin ka pësuar defekt. Pas ndërhyrjes së autoriteteve, fatmirësisht familja me katër anëtarë u shpëtua.
“Rrezikuan të mbyteshin në det, pasi mjeti me të cilin lundronin pësoi defekt, shërbimet e Policisë Kufitare i shkojnë në ndihmë një familjeje me 4 pjesëtarë, mes tyre 2 fëmijë të mitur.
Shërbimet e Policisë Kufitare të DVKM Durrës janë njoftuar se 4 pjesëtarëve të një familjeje, mes tyre 2 fëmijë të mitur, iu rrezikohej seriozisht jeta, në det, pasi mjeti lundrues (varkë plastike) me të cilin po lundronin për qëllime argëtimi, kishte pësuar defekt, në gjirin e Durrësit.
Menjëherë pas marrjes së këtij njoftimi, shërbimet e Policisë Kufitare të DVKM Durrës janë nisur me mjet lundrues, drejt vendit të sinjalizuar.
Si rezultat i operacionit të shpëtimit, 4 familjarët u nxorrën në breg, në gjendje të mirë shëndetësore. Gjithashtu, mjeti lundrues që kishte pësuar defektin, u nxor në treg duke u tërhequr nga mjeti lundrues i Policisë Kufitare”, thuhet në njoftim.
Discussion about this post