“Ke fjetur si Basha?”, Këlliçi përplaset me Rakipin: Je shumë cinik, jashtë realitetit

Kandidati në Primaret e Partisë Demokratike për Tiranën Belind Këlliçi, është përplasur me gazetarin Ylli Rakipi.

Gjatë kohës që Këlliçi po fliste për periudhën kur Bashkia e Tiranës drejtohej nga Lulzim Basha, Rakipi e pyeti edhe nëse ai ka fjetur gjumë njësoj si ish-kryebashkiaku. Këlliçi tha se i ka bërë punët me devotshmëri dhe korrektesë e se nuk është pjesë e atij grupi që mendon se Basha ka fjetur vetëm gjumë. Sipas Këlliçit, mirë apo keq, Basha vetëm 80 leje ndërtimi ka dhënë, jo si kryebashkiaku Erion Veliaj që ka kaluar 1 mijë të tilla.

Debati vijoi më tej kur Këlliçi u pyet nga Rakipi për emra oligarkësh dhe nuk tha asnjë prej tyre. Kjo gjë bëroi që Rakipi ta krahasonte Veliajn, ndërsa Këlliçi e quajti ‘cinik’ gazetarin.

Pjesë nga biseda:

Ylli Rakipi: Cfarë ke bërë ti deri sot që shkove 35 vjeç, për të mundur një përbindësh, në mënyrë metaforike. Çfarë ke bërë ti deri sot?

Belind Këlliçi: Unë në vitin 2009 jam kthyer në Shqipëri, pasi kam përfunduar studimet në SHBA. Jam kthyer në Tiranë, për të qëndruar pranë familjes dhe së dyti për të ndjekur një rrugëtim dhe ëndërr timen që ka qenë politika dhe kontributi në shoqëri. Kam filluar angazhimin politik në vitin 2015 në strukturat e PD. Kam garuar dhe jam zgjedhur kryetar i forumit rinor, pozicion që i kam dedikuar shtatë vite të plota. Në vitin 2021 jam zgjedhur deputet i Kuvendit të Shqipërisë, me mbi 11 mijë vota personale, duke kaluar edhe herësin.

Ylli Rakipi: Ti paske punuar në zyrat e Lulit në Bashki. Çfarë ke bërë aty? Mos ke fjetur edhe ti si Luli aty?

Belind Këlliçi: Unë i kam bërë punët me devotshmëri dhe korrektesë. Jam marrë me projektet kulturore, kam ndjekur të gjithë eventet që janë organizuar. Nuk kam qenë ndonjë titullar i lartë. Nuk hyj te ata që mendojnë se Basha ka fjetur vetëm gjumë. Basha mirë apo keq, 80 leje ndërtimi ka dhënë. Ky ka dhënë mbi një mijë vetëm vitin e kaluar. Disa projekte të mira u bënë, u arrit të përfundoheshin. Në vitin 2013 edhe me ndërrimin e pushtetit, pati bllokim të punëve në Bashki që më pas u implementuan me ardhjen e Veliaj. Me aq sa kam patur mundësi kam dhënë shembullin tim. Në 6 vite që kam punuar në administratë publike, nuk mund të më ngrejë askush asnjë akuzë të vetmë që kam abuzuar apo kam shkelur ligjet.

Ylli Rakipi: PD thotë se Tirana i është ndarë 4-5 të pasurve, oligarkëve. Kush janë oligarkët në Shqipëri?

Belind Këlliçi: Je shumë cinik në pyetje. Je shumë jashtë realitetit.
Të sfidoj të më gjesh mua lidhje me një oligark. Unë nuk flas me gjuhën e vjetër dhe nuk vë gjoba. Nuk jam kundër biznesit të ndershëm.

Ylli Rakipi: Ç’lidhje ka kjo me gjobat? Unë po të pyes kush janë oligarkët. Ti nuk paske ndryshim nga Veliaj. Ndryshoni vetëm në fytyrë.

Belind Këlliçi: Fyerje më të rëndë se kjo nuk ka.

Ylli Rakipi: Unë të kërkova emra oligarkësh. Ti ishe në dasmën e tjetrit, ulur me oligarkun në tavolinë.

Belind Këlliçi: Unë kam qenë në dasmën e shokut të forumit dhe kam qenë me gjashtë vetë të forumit.

Ylli Rakipi: Kush janë oliagrkët? Ju bërtisni për oliagrket.

Belind Këlliçi: Unë nuk ju vë gjoba oligarkëve. Kjo është praktikë gjobash.

Ylli Rakipi: Jo dasma e forumit, por dasma e Shkëlzenit. Po flas që rrije me oligarkun.

Belind Këlliçi: Unë nuk ju vë gjoba oligarkëve.

Ylli Rakipi: Ti ke qenë aty me oligarkë, të lani dhe të lyeni.  Si qenka pyetje cinike kur unë pyes kush janë oligarkët? Nuk thua asnjë emër. Do të bëhesh ti kryetar Bashkie nesër?!