Drejtuesi politik i PD-së për Tiranën, Belind Këlliçi denoncoi se nga Bashkia e Tiranës po hiqen dokumente që kanë të bëjnë me vjedhjet që janë kryer më herët nga drejtorët.
Këlliçi i bëri thirrje SPAK-ut të hetojë punonjësit dhe ish-punonjësit që kanë kryer këto ditë heqjen e dokumenteve nga Bashkia e Tiranës.
Po ashtu i bëri thirrje kreut të SPAK-ut Altin Dumanit të hetojë vizitat në burg te drejtorët e Veliajt pasi ata po firmosin dokumente në lidhje me vjedhjet në të shkuarën.
“Kam një thirrje të drejtpërdrejtë për SPAK-un. Hetoni punonjësit apo ish-punonjësit e Bashkisë së Tiranës që janë thirrur për të grisur dokumente, për të hequr dokumente, për të firmosur dokumente në protokoll. I bëj thirrje Altin Dumanit, trego që nuk je koleg i Veliajt, trego që nuk ke agjendë politike, por je aty për të zbatuar ligjin dhe për të çuar para drejtësisë ata që vjedhin qytetarët dhe mos luftoni me opozitën.
Hetoni vizitat në burg të drejtorëve të arrestuar shihni a kanë shkuar aty dokumentet për t’u firmosur sot nga vjedhjet e kaluara”, tha Këlliçi.
Këlliçi ka denoncuar nga protesta para Bashkisë së Tiranës se, një institucion që ka 500 milionë euro buxhet dhe shpërdoron taksat e shqiptarëve i duhet të gjobisë me 6.4 milionë euro qytetarët dhe 2.9 milionë euro bizneset që të vjedhë Erion Veliaj.
“Imagjinoni një njeri që merr taksat e Tiranës e i shpërdoror, me një incinerator që paguhet 88 milionë euro dhe nuk ekziston, i duhet të gjobisë me miliona euro qytetarët e Tiranës në mënyrë që Veliaj të vjedhë për vete.
Një institucion që ka 500 milionë euro buxhet dhe shpërdoron taksat tona, i duhet të gjobisë me 6.4 milionë euro qytetarët që të vjedhë Erion Veliaj pasi nuk ka vende për parkim. Po i vendosen 2.9 milionë euro gjoba bizneseve, që të vjedhë Erion Veliaj”, tha Këlliçi.
Discussion about this post