Deputeti i PD, Belind Këlliçi, i bën sërish thirrje Lulzim Bashës të largohet nga drejtimi i partisë. Përmes një postimi në Facebook, ai shprehet se Basha ka regjistruar rekord me 6 humbje, prandaj nuk ka më arsye për të vazhduar. Sipas tij, Basha nuk duhet të kapet më pas Bershës, por të largohet njëherë e mirë nga PD. “Hera e fundit që Lulzim Basha foli si kryetar i Partisë Demokratike ishte më 11 dhjetor 2021. Nëse po mendon të bëjë një akt largimi, ta bëjë nga pengmarrja e siglës së Partisë Demokratike, e vulës dhe e selisë së saj. Ta shoqërojë me një ndjesë publike për demokratët, se u hodhi gaz, u mohoi sakrificat, kontributet dhe i la në baltë 6 herë. Lulzim Basha nuk është në pozitën t’i vendosë kushte askujt. Me 6 humbje në xhep nuk ka çfarë negocion. Nesër në mbledhjen e grupit parlamentar të PD, Lulzim Basha nuk mundet kurrësesi të kushtëzojë largimin e tij me largimin e Sali Berishës apo cilitdo anëtari tjetër të Komisionit të Rithemelimit”, tha ai.
Sakaq, Këlliçi iu ka bërë thirrje delegatëve që të mos mbështesin Bashën, por të kërkojnë largimin e tij nga PD. Ndërsa theksoi se duhet të respektojnë votën e lirë dhe jo të mbahen peng, pasi kështu po shkatërrojnë PD-në.
“Kolegët deputetë nuk mundet kurrësesi të bien pre e kësaj tentative përçarjeje të radhës. Vendimet merren nga Kuvendi Kombëtar dhe anëtarësia e Partisë Demokratike! I bëj thirrje miqësisht kolegëve të grupit parlamentar, të distancohen nga kjo tentativë e fundit e një humbësi për t’iu imponuar demokratëve! Imponim ndaj votës së lirë nuk ka dhe nuk mund të ketë! Respektoni anëtarët e partisë tuaj! Respektoni votën e zgjedhësve! Respektoni votën e lirë”, shkruan ai.
Discussion about this post