Këlliçi: Po të kishte pasur valë votuesish Tirana do kishte tjetër rezultat në 14 maj

Belind Këlliçi, i cili në zgjedhjet e 14 majit garoi për kryebashkiak të Tiranës, i mbështetur nga koalicioni “Bashkë Fitojmë” tha në studion e Abcnews se në kryeqytet pati një përqindje të ulët votuesish dhe duhen analizuar shkaqet.

Këlliçi tha se nëse do të kishte një pjesëmarrje më të lartë atëherë do të kishte një tjetër rezultat për Tiranën.

“Që të jem shumë i sinqertë, ne jemi në fazën ku po bëjnë dokumentimin e parregullsive. Do të ketë një fazë të dytë, sa i përket analizës së fenomeneve që kanë çuar në përqindje të ulët të daljes aq pak votues në Tiranë.

Me gjithë parregullsitë, sërish po të kishte pasur një valë të madhe votuesish, rezultati do të ishte kthyer.

Sot nuk  e kam përgjigjen  për këtë”, u shpreh Këlliçi.

Në lidhje me faktin nëse ka ndikuar koalicioni me Metën, Këlliçi tha se nuk na rezulton që koalicioni me Metën, por as “non-grata” të jetë një problem për votuesit.

“Zoti Berisha nuk bëri koalicion me Metën, si një risi politike shqiptare. Por Edi Rama për herë të parë vendosi një standart të padëgjuar, ku koalicioni që u formua i çon shkresë KQZ që drejtues është Berisha  dhe ajo me urdhër politik tha jo, kryetar është Meta.

Në fletën e votimit ka qenë emri i Belind Këlliçit, nuk ka pasur lidhje fare me këto që thuhen. Ju sfidoj juve të më thoni një premtim të kryetarit aktual, u bë vetëm politike.

Unë mbase nuk kam pasur premtime të plota, por kam pasur një program.

Është folur për “non-grata”, ndërkohë që kjo nuk rezulton një problem tek qytetarët, as koalicioni nuk me rezulton problem.

Në 2019 nuk hymë farë dhe faturën e këtij gabimi po paguajmë edhe sot”, u shpreh Këlliçi.

Gjatë gjithë fushatës së tij, Këlliçi u pa i vetëm  dhe jo i shoqëruar me deputetë të “Foltores”, për këtë ai tha se realisht “Foltorja” ka vetëm 4 deputetë në Tiranë dhe një prej tyre ishte, të tjerët ishin angazhuar në pjesë të tjera të vendit dhe i vetmi që e ka shoqëruar ka qenë Agron Shehaj.

“Nëse e keni informacionin e plotë, në Tiranë PD ka pasur vetëm 4 deputetë, një prej tyre kam qenë unë, Vokshi dhe Noka kanë qenë në vende të tjera dhe i vetmi ka qenë Agron Shehaj që ka qenë me mua.

Plus që nuk ka pasur arsye për të qëndruar të gjithë në një vend” tha ai.