Belind Këlliçi, drejtues politik i PD-së për Tiranën, e konsideroi si shenjë të degjenerimit final të pushtetit të Edi Ramës inskenimin si skemë krimi të trotuarit para Kryeministrisë, pas protestës së opozitës.
E ndërsa mijëra qytetarë iu përgjigjën thirrjes së opozitës për të protestuar, pati disa incidente sporadike ku një grup të rinjsh hodhën molotov, flakadanë dhe shashka në trotuarin, që më parë ishte konsideruar si zonë sigurie nga Policia e Shtetit.
Pikërisht vendi ku ranë shashkat dhe sendet e tjera, menjëherë pas protestës u konsideruan si skenë krimi, ku u shfaqën ekspertët kriminalist, njëlloj si skenat brenda parlamentit, ku sa herë janë hedhur tymuese, janë shfaqur personazhe veshur me kostume të bardha, duke mbledhur provat.
Protesta pasoi me ndalimin, shoqërimin dhe arrestimin e disa prej protestuesve, ndërsa Këlliçi i ka bërë thirrje Edi Ramës dhe Taulant Ballës, që ti japin fund provokimeve ndaj opozitës.
“Gjezdisja për disa orë në shkallët e selisë së qeverisë, ishte një akt neverie që buron nga urrejtja e tyre dhe shefave të tyre për fjalën e lirë, demonstrimin qytetar dhe të drejtat e opozitës.
Partia Demokratike u bën thirrje Edi Ramës dhe Taulant Ballës t’u japin fund provokimeve ndaj opozitës, të lirojnë protestuesit, të respektojnë të drejtat e tubimit qytetar. Policëve që angazhohen në tejkalim të kompetencave dhe me zell partiak në dhunimin dhe arrestimin e protestuesve tanë, u themi fare qartë se i njohim, ua dimë fytyrat dhe bëmat dhe do të përgjigjen një më një, dhe pa kaluar gjatë”, tha Këlliçi.
Sipas tij, angazhimi i policëve civilë për të intimiduar, goditur dhe arrestuar protestuesit e opozitës, është shenja se pushteti ka frikë nga qytetarët dhe nga opozita.
“Partia Demokratike siguron të gjithë protestuesit se ne do tu dalim zot. Tubimi i djeshëm, i qindra mijëra shqiptarëve është siguresa e garancisë se në këtë vend është sovrani që e ushtron pushtetin, dhe ata qeveritarë në kryeministri dhe ata policë me uniformë, janë vetëm qiraxhinj në shtetin e shqiptarëve.
Taulant Balla, Muhamet Rrumbullaku e të tjerë, të bëjnë kujdes! Tu thonë zelltarëve partiakë në polici se nuk i mbron asgjë para së drejtës dhe ligjit. Nuk mund të fshihen dhe nuk mund të marrin garanci paprekshmërie nga ata që as vetë nuk i kanë këto garanci! Kush prek demokratët do të përgjigjet një më një.
Çdo procedim, ndalim apo abuzim me protestuesit e djeshëm do të marrë përgjigje ligjore dhe qytetare.
Cdo polici abuziv do t’ia çojmë ligjin te dera, çdo shkelësi do t’i kujtojmë se interesat e qytetarëve, e drejta e fjalës dhe protestës, nuk mund të negociohen me patronazhistët e pushtetit.
Bëni kujdes, sepse kujdestaria e pushtetit nuk e ndal dot shpagimin e ligjit, dhe kur kjo të ndodhë as Edi, as Taulanti nuk do jenë aty për tu mbrojtur”, tha Këlliçi.
Discussion about this post