Çmimet e karburanteve dhe ushqimeve në vendin tonë po vijnë gjithmonë ën rritje, duke vënë në vështirësi qytetarët. Për këtë ka reaguar sot Presidenti Ilir Meta, i cili përmes një postim në rrjetet sociale Meta shkruan se ky fenomen po dëmton seriozisht ekonomitë familjare dhe thellon më tej varfërimin e shqiptarëve. Më tej Meta në reagimin e tij shprehet se është koha për një politikë të përgjegjshme ekonomike në interes të qytetarëve.
“Koha për një politikë të përgjegjshme ekonomike në interes të qytetarëve. Çmimet në vend vazhdojnë të rriten në nivele shqetësuese, duke dëmtuar seriozisht ekonomitë familjare dhe thelluar varfërimin e shqiptarëve.
Në janar 2022 çmimet në total janë rritur në masën 5.0%, ndërsa të mallrave ushqimore në 9.9%. Ndërkohë sipas të dhënave të EUROSTAT, Shqipëria ka nivelin më të lartë në rajon në përqindje të mesatares europiane”, shkruan ai.
Meta kërkoi nga institucionet shtetërore përgjegjëse që jo vetëm duhet të monitorojnë zhvillimet e inflacionit, por edhe të marrin nisma konkrete për indeksimin e pagave me qëllim për të ruajtur nivelin e jetesës së qytetarëve.
“Në kushtet kur rritja e çmimeve të ushqimeve dhe energjisë vijon pa u ndalur, institucionet shtetërore përgjegjëse jo vetëm duhet të monitorojnë zhvillimet e inflacionit, por edhe të marrin nisma konkrete për indeksimin e pagave me qëllim për të ruajtur nivelin e jetesës së qytetarëve.
Mosreagimi ndaj rritjes së çmimeve nuk është në përputhje me interesin publik, rritjen e mirëqënies së qytetarëve tanë dhe mbrojtjen e tyre nga spekulimet”, shprehet ai. Kanë qenë të shpeshta reagimet e Metës në lidhje me këtë çështje dhe madje në çdo rast iu kërkon qytetarëve që të ngrihen kundër qeverisë që po vendos një regjim mbi ta.
Discussion about this post