Trajneri i Vllaznisë, Thomas Brdaric ka folur në konferencën për mediat në prag të ndeshjes me Teutën.
Këtë të shtunë në orën 19:45 Kuqeblutë do të presin në stadiumin ‘Loro Boriçi’ durrsakët e Teutës, në atë që cilësohet si supersfida e javës së dytë ose ndeshja e kampionëve.
Ndërsa është pyetur në lidhje me konsiderimin e kësaj ndeshje si ‘hakmarrje’, tekniku i shkodranëve ka thënë: “Kemi vetëbesim sepse kemi dëshirë për tri pikë, duhet të jemi më konkret dhe cinikë në sulm me realizimin. Përvoja e të kaluarës në Superkupë dhemb dhe të mësojmë nga këto. Lojtarët duhet të bëjnë ndonjëherë më shumë se limitet e tyre.”
Ndërsa është pyetur për deklaratat e Presidentit të Teutës, Edmond Hasanbelliut, Brdaric ka thënë se nuk i interesojnë.
“Nuk jam i interesuar të jap asnjë përgjigje për këto deklarata, të jemi të fokusuar te ndeshja. Të gjithë e kanë qejf picën, të bën pak më të shëndoshë por të gjithë e duan.”- u shpreh trajneri i Vllaznisë.
Ndërsa rikujtojmë se gjatë ditës së enjte, Hasanbelliu ka bërë batuta, duke thënë se në ekipin e tij ka më shumë shkodranë se te Vllaznia.
“Kemi më shumë shkodranë ne në ekip sesa Vllaznia… Do të jetë një ndeshje e fortë dhe shpresoj që skuadrat të kënaqin publikun, se e meriton.”-u shpreh kreu i Teutës.
Ndërsa rikujtojmë se ndeshjet e fundit midis tyre janë fituar nga ‘Djemtë e Detit”, siç ishte edhe ajo e Super Kupës së Shqipërisë./Sportzona.al
