“Këneta dhe Latifi”, LaCivita i përgjigjet Ramës me imazhin e miut në kthetrat e bufit

Kryestrategu amerikan i fushatës së Partisë Demokratike, Chris LaCivita i është kundërpërgjigjur kryeministrit Edi Rama, përmes një postimi në platformën X.

Vetëm 3 ditë para zgjedhjeve të 11 majit, LaCivita ka publikuar një foto simbolike që tregon një buf që ka kapur një mi, duke e shoqëruar me etiketimin e adresës zyrtare të kreut të qeverisë, Edi Rama, pa asnjë koment tjetër.

Kjo nuk është hera e parë që LaCivita përdor llogarinë e tij personale në X për të sulmuar Ramën, të cilin e ka krahasuar me një mi, në përgjigje të etiketimit të kryedemokratit Sali Berisha si “bufi i kënetës” nga ana e kryeministrit.

Megjithatë këto replika në distancë kanë vijuar edhe nga vetë Rama, i cili në të gjitha takimet, nuk është munduar të shpalosë një projekt ekonomik për 4 vitet e ardhshme, por është mjaftuar me batuta apo edhe ofendime ndaj qytetarëve, ku nuk kanë munguar edhe etiketimet ndaj Berishës, si bufi i kënetës, etj.

Madje Rama nuk ka ngurruar të ofendojë edhe strategun e fushatës së Donald Trump në SHBA, dhe tashmë ndodhëet në Shqipëri përkrah Berishës, me tone ironike si “Latifi”.

Ky ironizim i LaCivita vjen pak orë pasi gazetari amerikan i “Politico”, Marc Caputo ka njoftuar përmes një njoftimin në llogarinë e tij në platformën “X” se Departamenti Amerikan i Shtetit ka lejuar Sali Berishën të udhëtojë për në SHBA.

“Ne japim rregullisht përjashtime për të lehtësuar udhëtimin e individëve të caktuar në SHBA, në përputhje me detyrimet ndërkombëtare dhe interesat tona kombëtare. Si e tillë, ne nuk do të lejojmë që interesat tona të politikës së jashtme apo marrëdhëniet me Shqipërinë të mbahen peng nga vendime të politizuara të epokës së Biden-it” – thuhet në reagimin e Departamentit Amerikan të Shtetit dërguar për gazetarin.