Policia ka ndaluar paraditen e sotme në Shkodër Gjovalin Shkëmbin, xhaxhain e Elvis Shkëmbit – autori i dyshuar për vrasjen e gjyqtarit të Apelit, Astrit Kalaja. Ndalimi vjen vetëm pak minuta pasi Shkëmbi kërcënoi publikisht çdo gjyqtar që do të lërë në burg nipin e tij.
Burime zyrtare nga policia bëjnë me dije se Gjovalin Shkëmbi është shoqëruar në ambientet e komisariatit të Shkodrës dhe po procedohet penalisht për veprën penale të kanosjes, në kuadër të deklaratës së tij kërcënuese ndaj trupës gjykuese.
Në një intervistë për mediat lokale, konkretisht për “Shkodra Blog”, Shkëmbi deklaroi haptazi:
“Kushdo që dënon atë djalë, të njëjtën gjë ka me pësu – qoftë edhe Donald Trump e Papa – nuk ka lojë me ne.”
Ai i referohej ndalimit të nipit të tij, Elvis Shkëmbi, i cili akuzohet për vrasjen me armë zjarri të gjyqtarit Kalaja në sallën e gjyqit më 6 tetor – një ngjarje e pashembullt që ka tronditur sistemin e drejtësisë dhe opinionin publik.
Deklaratat e Gjovalin Shkëmbit u konsideruan si kërcënim serioz dhe nxitje për dhunë ndaj gjyqtarëve, ndërsa autoritetet vepruan menjëherë për ndalimin e tij.
Policia dhe prokuroria janë duke hetuar nëse kërcënimet janë të organizuara dhe nëse ka elementë të tjerë që mund të përbëjnë cenim të pavarësisë së gjyqësorit apo pengim të drejtësisë.
Ngjarja vjen në një klimë tensioni pas vrasjes së gjyqtarit Kalaja, ku autoritetet kanë theksuar nevojën për masa të forta sigurie për magjistratët, ndërsa ndërkombëtarët kanë dënuar ashpër aktin dhe çdo formë intimidimi ndaj drejtësisë.
Discussion about this post