Është caktuar masa e sigurisë “Arrest me burg”, për presidentin e klubit “Iliria” Nazmi Selmani, i cili akuzohet se ka kërcënuar presidentin e FSHF, Armand Duka.
E njëjta masë sigurie u caktua nga Gjykata e Durrësit edhe për Petrit Selmanin, ndërsa për Brajan Selmani, Redian Loci dhe Santiago Selmani u caktua masë më e butë, ajo e “detyrim paraqitje”.
Nazmi Selmani së bashku me tre djemtë e tij më 30 gusht 2024 kërcënuan me anë të një mesazhi në telefon, presidentin e Federatës Shqiptare të Futbollit, Armand Duka.
Po ashtu, ata i shkuan në shtëpinë e tij duke e kërcënuar se do ta dhunonin. Motivi ka të bëjë me mosgrumbullimin në Kombëtare të Gentian Selmanit (djali tjetër i Nazmiut), i cili është portieri i Tiranës.
VENDIMI:
1- Vleftësimin e ligjshëm të arrestimit në flagrancë të personave nën hetim N. Selmani, S. Selmani, B. Selmani, P. Selmani dhe R. Loci, të dyshuar për kryerjen e veprës penale “Kanosja për shkak të detyrës”, në bashkëpunim, parashikuar nga neni 238/1 e 25 të Kodit Penal.
2- Caktimin e masës së sigurimit personal “Arrest në burg” parashikuar nga neni 238 i K.Pr.Penale, ndaj personave nën hetim N. Selmani dhe P. Selmani.
3- Caktimin e masës së sigurimit personal “Detyrim për tu paraqitur në policinë gjyqësore” parashikuar nga neni 234 i K.Pr.Penale, ndaj personave nën hetim S. Selmani, B. Selmani dhe R. Loci.
4- Urdhërohen personat nën hetim S. Selmani, B. Selmani dhe R. Loci të paraqiten në Prokurorinë pranë Gjykatës së Shkallës së Parë e Juridiksionit të Përgjithshëm Durrës, të Hënën e parë dhe të fundit të çdo muaji, ora 10:00.
5- Urdhërohet lirimi i menjëhershëm i personave nën hetim S. Selmani, B. Selmani dhe R. Loci, nga salla e gjykimit, nëse nuk mbahen për ndonjë shkak tjetër ligjor.
6-Urdhërohet Prokuroria dhe Policia Gjyqësore për zbatimin e këtij vendimi.
7- Kundër këtij vendimi mund të bëhet ankim brenda 5 (pesë) ditëve në Gjykatën e Apelit të Juridiksionit të Përgjithshëm Tiranë, duke filluar ky afat nga e nesërmja e komunikimit të vendimit të arsyetuar.
U shpall sot në Durrës, më datë 04 Shtator 2024.
Discussion about this post