Kërcet arma në një fshat të Prishtinës, plagosen dy persona

Të shtëna me armë zjarri janë regjistruar para pak minutash në Prishtinë. Ngjarja është regjistruar në fshatin Bardhosh.

Dy persona janë plagosur. Zëdhënësi i Policisë së Kosovës, Agron Borovci tha për Telegrafin se rasti ka ndodhur rreth orës 15:30.

“Rreth orës 15:30 është pranuar informata për një rast të plagosjes me armë zjarri të ndodhur në fshatin Bardhosh të komunës së Prishtinës. Policia ka dalë në vendin e ngjarjes dhe mbështetur në të dhënat e para, janë ngritur dyshimet se dy persona janë plagosur me armë zjarri nga persona aktualisht të panjohur”, ka thënë ai.

Borovci ka shtuar e viktimat janë dërguar në QKUK për të marrë trajtimin e nevojshëm mjekësor.

“Hetuesit policor kanë nisur një hetim me qëllim të sqarimit të të gjitha rrethanave që karakterizojnë rastin si dhe identifikimin e të dyshuarve të mundshëm”, shtoi tutje Borovci.

Sakaq nuk dihet nëse ka patur këmbësorë, apo dëshmitarë të kësaj ngjarjeje në momentin kur janë dëgjuar të shtënat e armës.

Theksojmë se Kosova ditët e fundit është përballur me ngjarje të rënda, ku me e fundit ishte sulmi me armë zjarri drejt autobusit në Gllogjan ku humbën jetën 4 persona mes të cilëve dy nxënës.