Këshilli i Mandateve do të mblidhet më 18 dhjetor për të vendosur lidhur me kërkesën e SPAK ndaj ish-Kryeministrit Sali Berisha.
SPAK i kërkon Kuvendit një autorizim lidhur me një masë shtrënguese arrest me burg ose arrest shtëpie ndaj ish-Kryeministrit Berisha, i cili ka refuzuar të zbatojë masat e vendosura më herët ndaj tij, atë të “detyrimit të paraqitjes” dhe “ndalim të daljes jashtë vendit”.
Tashmë kërkesa e SPAK do të diskutohet në datën 18 dhjetor, ku pritet një përballje mes Prokurorëve të SPAK, Arben Kraja dhe Enkelejda Millonai, me ish-Kryeministrin Sali Berisha.
“Mbledhja e Këshillit për Rregulloren, Mandatet dhe Imunitetin për shqyrtimin e kërkesës së Prokurorisë së Posaçme Kundër Korrupsionit dhe Krimit të Organizuar për dhënien e autorizimit nga Kuvendi për arrestimin/heqjen e lirisë së deputetit Sali Berisha, nëpërmjet zëvendësimit të masës së sigurimit, do të zhvillohet në datën 18.12.2023, ora 12.00, në Kryesinë e Kuvendit”, thuhet në një njoftim zyrtar.
Gjithashtu pritet që në mbështetje të dy prokurorëve që po hetojnë dosjen e privatizimit të ish-kompleksit Partizani, të jetë edhe Altin Dumani, kreu i SPAK-ut.
Berisha i konsideroi masat e vendosura më herët ndaj tij si anti-Kushtetuese, pasi SPAK dhe më pas GJKKO vepruan pa marrë një autorizim nga Kuvendi.
Ndërsa sot, në reagimet mediatike, Berisha tha se do të pranojë çdo vendim të Parlamentit, pas paraqitjes së kërkesës nga SPAK.
Vendimi që do të marrë Këshilli i Mandateve i përcillet seancës plenare, e cila e miraton me shumicë të thjeshtë votash.
Procedura që ndiqet
Në pikën 1 të nenit 118 të ndryshuar, saktësohet se Prokuroria kërkon nga Kuvendi autorizim për caktimin e masës së sigurimit të arrestit me burg ose në shtëpi, heqjes se lirisë në çfarëdo lloj forme, kontrollit personal ose të banesës të deputetit me një relacion të arsyetuar dhe të shoqëruar me prova. Pra SPAK duhet të bindë Kuvendin se ka prova që Sali Berisha ka kryer “korrupsion pasiv”, vepra penale për të cilën akuzohet.
Më pas, Kuvendi cakton mbledhjen e Këshillit për Rregulloren, Imunitetin dhe Mandatet si edhe do duhet të vërë në dijeni, në rastin konkret deputetin Sali Berisha. Kuvendi si Institucion e ka për detyrë që t’ia dorëzojë shkresën zyrtarisht.
Në mbledhjen e Këshillit, Berisha mund të jetë i pranishëm vetë në seancë për t’u mbrojtur, e nëse refuzon të jetë personalisht, atëherë ka të drejtën të paraqesë shpjegimet dhe vërejtjet e tij rreth çështjes me shkrim ose të përfaqësohet me mbrojtës ligjor.
Pas shqyrtim, brenda 2 javëve Këshilli do duhet që të paraqesë një raport ku përmblidhen pretendimet e palëve dhe në të cilin rekomandon rrëzimin ose miratimin e dhënies së autorizimit për caktimin e masës së sigurimit të arrestit në burg ose në shtëpi ndaj Sali Berishës, në rastin konkret. Raporti i Këshillit u shpërndahet deputetëve.
Në seancë plenare, do i jepet fjala të parit Sali Berishës, për të dhënë shpjegime ose për t’iu përgjigjur pyetjeve të deputetëve. Duhet thënë se Raporti i Këshillit nuk është objekt diskutimi.
Në fund, Kuvendi vendos me votim të hapur për dhënien ose mosdhënien e autorizimit për caktimin e masës së sigurimit të arrestit në burg ose në shtëpi ndaj ish-kryeministrit.
Në rastin kur Kuvendi nuk merr vendim brenda 3 muajve nga data e paraqitjes së kërkesës përkatëse, atëherë kërkesa konsiderohet e rrëzuar.
Discussion about this post