Pas rreth dy orësh debate në Këshillin për Rregulloren, Mandatet dhe Imunitetet, prokurorët e SPAK kanë lexuar zyrtarisht kërkesën për arrestimin e zv/kryeministres Belinda Balluku.
Në qendër të përplasjeve mes mazhorancës dhe opozitës është vënë USB-ja që përmban materialet hetimore. Partia Demokratike ka kërkuar që USB-ja me provat t’u dorëzohet deputetëve për t’u shqyrtuar edhe pas përfundimit të mbledhjes, ndërsa Partia Socialiste ka kundërshtuar fort, duke argumentuar se provat nuk duhet të dalin nga salla e mbledhjes.
Prokurorët e SPAK kanë sqaruar se USB-ja me provat për Ballukun mund të aksesohet vetëm nga anëtarët e Këshillit të Mandateve. Ata kanë deklaruar se materiali mund të shihet nga deputetët, por vetëm sipas rregullave të përcaktuara nga Këshilli. Nga ana tjetër, përfaqësues të mazhorancës, mes tyre edhe Taulant Balla, kanë insistuar që provat të shqyrtohen vetëm gjatë mbledhjes dhe të mos merren jashtë saj.
Gjatë diskutimeve është hedhur edhe ideja e shtyrjes së mbledhjes, për t’u dhënë palëve më shumë kohë për njohjen me materialet. Avokati i Belinda Ballukut ka kërkuar zyrtarisht shtyrjen e seancës, duke argumentuar se i nevojitet më shumë kohë për t’u njohur me dosjen, e cila përmban rreth 10 mijë faqe dhe për këtë arsye nuk është printuar, por është dorëzuar në format elektronik.
Sa i përket afateve, palët kanë qëndrime të ndryshme:
Avokati i Ballukut kërkon 3 javë kohë;
Prokuroria e SPAK vlerëson të mjaftueshme 3–5 ditë;
Partia Demokratike kërkon shtyrje maksimalisht deri të hënën;
Partia Socialiste propozon datën 19 janar.
Ndërkohë, gjatë zhvillimeve është raportuar se kryeministri Edi Rama është rikthyer në ambientet e Kryeministrisë, ndërsa tensionet politike vijojnë të mbeten të larta për një nga çështjet më të forta të momentit.
Discussion about this post