Kërkesa në Kushtetuese, Gjekmarkaj: S’ka lidhje me arrestimin, por me …

Deputeti demokrat, Agron Gjekmarkaj, ka reaguar në lidhje me kërkesën drejtuar Gjykatës Kushtetuese, përmes të cilës kërkohet një interpretim, lidhur me imunitetin e deputetit dhe nëse SPAK ka të drejtë të kufizojë ose jo lëvizjen e një ligjvënësi pa marrë më parë autorizim nga Kuvendi, sikundër ndodhi në rastin e Sali Berishës.

Gjekmarkaj shprehet se kërkesa nuk ka të bëjë me arrestimin e askujt, por me përcaktimin e standardit nëse për heqjen e lirisë për daljen jashtë vendit duhet ose jo autorizim nga Kuvendi.

Ai thotë se Gjykata Kushtetuese është ajo që thotë fjalën e fundit, teksa shton se standardi i imunitetit nuk është çështje personale e asnjë deputeti, por mbrojtje ndaj institucionit të Kuvendit të Shqipërisë.

Reagimi i Gjekmarkajt:

Standardi i imunitetit nuk është çështje personale e asnjë deputeti, por mbrojtje ndaj institucionit të Kuvendit të Shqipërisë.

Kërkesa për interpretimin e Kushtetutës nuk ka të bëjë me arrestimin e askujt, por me përcaktimin e standardit nëse për heqjen e lirisë për daljen jashtë vendit duhet ose jo autorizim nga Kuvendi.

Më parë Kuvendi ka mbajtur qëndrimin që duhet (rasti Tahiri), ndërsa së fundmi kjo dispozitë kushtetuese është aplikuar ndryshe. Është Gjykata Kushtetuese që duhet të thotë fjalën e fundit, dhe secili prej ne të tjerëve ta zbatojë standardin e vendosur prej saj!

Çdo abuzim me këtë fakt është thjesht retorike politike, përdorim që nuk ka lidhje me të vërtetën. Kushtetuta është garancia për të gjithë pa ngjyra politike.

Goditjet ndaj saj rrezik për të gjithë herët a vonë qoftë. Qartësia nuk është as pro as kundra dikujt ajo është thjesht e domosdoshme.