Në konferencën e përbashkët me ministrin e Drejtësisë Ulsi Manja, kryeministri Edi Rama po mundohet të justifikojë presionin që i bëri SPAK në Asamblenë e PS ku i kërkoi të hetojë ish kryeministrin Sali Berisha dhe Presidentin Ilir Meta.
Para gazetarëve, Rama tha se deklarata e tij nuk ishte presion, pasi sipas tij Berisha është shpallur non grata nga SHBA për akuza të rënda që lidhen me veprimtarinë tij në vendin tonë, prandaj është detyrë e SPAK të nisë hetimin.
“Çfarë presioni është të kërkosh hetimin e një ish presidenti e një ish kryeministri të shpallur “non grata” nga SHBA, me akuzat më të rënda të mundshme që lidhen drejtpërdrejt me veprimtarinë e institucioneve të këtij vendi? E ta bësh këtë, thuajse një vit pasi shpallja “non grata” është bërë dhe pasi Sekretari Amerikan i Shtetit ka kërkuar publikisht në deklaratë se institucionet e këtij vendi duhet të bëjnë punën e tyre? E që të jemi shumë të qartë, unë skam kërkuar e askush nuk ka kërkuar dënim por hetim. Hetim, dënimin nuk e vendosim ne, por të hetohet një çështje që është gur në qafë për Shqipërinë e nuk është çështje e një personi, është domosdoshmëri. Që të zbardhet deri në fund e vërteta nga një drejtësi e drejtë e pavarur, që është e pavarur nuk ka diskutim se sot nuk do ishin pas hekurave ish ministra e ish deputet e ish kryetarë bashkie, të lidhur me këtë parti që është në pushtet, që janë të pavarur kjo nuk ka pikë diskutimi, ndaj kjo drejtësi e pavarur duhet të çlirohet nga çdo frikë e të kaluarës, e më në fund të hetohen 21 janari, krimi shtetëror nuk parashkruhet, nuk ekziston, të hetohet deri në fund nëse është apo nuk është. Të hetohet Gërdeci, disa skandale te mëdha korruptive”, tha Rama.
Discussion about this post