Gjykata e Posaçme e Apelit për Korrupsionin dhe Krimin e Organizuar ka lënë në fuqi vendimin e Shkallës së Parë për vazhdimin e masës së sigurimit “arrest në burg” ndaj Ilir Metës.
Meta kishte paraqitur ankimim dhe kërkonte shuarjen e masës së sigurimit të vendosur më herët ndaj tij, por pas vlerësimit të argumenteve të palëve Apeli i posaçëm ka lënë në fuqi masën e “arrestit në burg”.
Njoftimi:
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Saida Dollani, sot më 14.11.2025, shpalli vendimin mbi çështjen penale nr. 256 akti, datë 04.11.2025 regjistrimi, mbi ankimin e të pandehurit I.M., me objekt: “Ankim kundër vendimit Nr. 672, datë 22.10.2025 të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Shuarjen e masës së sigurimit personal të “arrestit në burg” për të pandehurin I.M.” dhe vendosi:
Miratimin e vendimit nr. 672, datë 22.10.2025 të Gjykatës së Posaçme të Shkallës së Parë për Korrupsionin e Krimin e Organizuar.
U shpall në Tiranë, me datë 14.11.2025.
Më 29 gusht, SPAK përfundoi hetimet ndaj Ilir Metës dhe ish-bashkëshortes së tij, Monika Kryemadhi, për akuzat e korrupsionit, pastrimit të parave dhe fshehjes së pasurisë, duke e dërguar çështjen në gjykatë për shqyrtim në seancë paraprake.
Bashkë me ta, janë dërguar për gjykim edhe Fatime Kryemadhi, nëna e Monika Kryemadhit, ish-kreu i AKEP Pirro Xhixho dhe ish-financierja e LSI-së, Ema Çoku.
Procedimi penal ndaj tyre ka nisur në vitin 2019 dhe është zgjeruar në vitet pasuese ndërsa gjatë vitit 2024, të gjitha procedimet e veçuara janë bashkuar në një të vetëm.
Discussion about this post