Kërkoi lirinë, Gjykata e Lartë rrëzon kërkesën e Ilir Metës

Gjykata e Lartë ka rrëzuar rekursin e paraqitur  nga Ilir Meta, i cili kërkonte lirimin nga qelia dhe zëvendësimin e masës së sigurisë.

Meta kishte kërkuar që masa e arrestit me burg të zëvendësohej me një më të lehtë, por trupa gjykuese nuk e pranoi argumentimin e mbrojtjes.

Ilir Meta, ndodhet në qeli prej 21 tetorit 2024, pasi ndaj tij u ngritën akuza të rënda nga SPAK për pastrim parash, korrupsion pasiv të funksionarëve të lartë publikë dhe fshehje të pasurisë.

Hetimi ndaj Metës lidhet me aferën CEZ-DIA – një çështje që përfshin marrëdhëniet e kompanisë çeke CEZ me biznesmenin Kastriot Ismailaj – dhe me lobimet e ish-LSI-së në SHBA, për të cilat SPAK pretendon se janë përdorur fonde të padeklaruara me origjinë të dyshimtë.

Sipas hetimeve, Meta dyshohet se ka përfituar rreth 6.5 milionë euro nga afera CEZ-DIA dhe ka mosdeklaruar 400 mijë dollarë për lobime në Shtetet e Bashkuara. Prokuroria e Posaçme e ka marrë atë zyrtarisht të pandehur, së bashku me ish-bashkëshorten e tij, Monika Kryemadhi, që ndodhet nën masën e detyrimit për paraqitje.