Apeli i GJKKO-së ka lënë në fuqi masën e sigurisë “arrest në burg” për ish-kreun e ARRSH-së Evis Berberi, duke rrëzuar kërkesën e këtij të fundit për një masë më të lehtë sigurie. Gjykata rrëzoi të njëjtat kërkesa edhe për Valter Begajt dhe Ervis Lamin, të arrestuar për të njëjtin procedimi penal.
Evis Berberi, një nga bashkëpunëtorët e afërm të zëvendskryem inistres Belinda Balluku është arrestuar për korrupsion dhe pastrim parash, së bashku me Begajn e Lamin, me të cilët, sipas hetimeve, kishte pasur marrëdhënie në një shoqëri të zotëruar prej tij.
Sipas SPAK: Berberi në cilësinë e kreut të dy institucioneve shtetërore, ka kërkuar dhe përfituar shuma të konsiderueshme parash nga një shoqëri e cila ka qenë fituese e tenderave në këto ente publike. Për të mundësuar marrjen e ryshfetit ka përdorur një mënyrë të tërthortë, ku shoqëria fituese e tenderave të institucioneve që ai drejtonte, i transferonte paratë në një shoqëri tjetër të kontrolluar prej tij.
Së bashku me Berberin u vendosën në pranga edhe Valter Begaj, pronari komanisë që përfitonte tenderat dhe njëkohësisht ortak i shoqërisë së zotëruar indirekt nga ana e Berberit, si dhe Ervis Lame, administratori i shoqërisë së Berberit dhe punonjës në shoqërinë e Begajt.
Me kërkesë të SPAK, Gjykata e Posaçme e Shkallës ka vendosur masën e sigurimit pasuror “sekuestro preventive” mbi kuotat e shoqërisë “DAAM” sh.p.k., me ortak Valter Begaj dhe administrator Ervis Lamen, shoqëri që sipas prokurorisë, kontrollohej prej Berberit. Por ashtu, janë sekuestruar pasuritë e blera nga kjo shoqëri, pesë ngastra toke të llojit “arë” në Mangull të Tiranës me sipërfaqe totale 34 mijë e 235 m2. “Sekuestro preventive” është vendosur vetëm mbi pjesët takuese të shoqërisë “DAAM” sh.p.k.. Po ashtu, janë sekuestruar edhe 7 automjete.
Discussion about this post