Gjykata Kushtetuese ka rrëzuar ankimin e gjyqtares së Krujës Enkelejda Hoxha për vendimin e KLGJ në lidhje me shkarkimin nga detyra. Hoxha ndodhet pas hekurave pasi u arrestua nga SPAK për korrupsion ndërsa gjykata i ka refuzuar disa herë kërkesën për lehtësim të masës së sigurisë.
Kjo e fundit u arrestua nën akuzën e korrupsionit, ku në këmbim të shumave të mëdha monetar ndërhynte për uljen e dënimit për të burgosurit në mënyrë që ata të liroheshin.
Gjyqtarja ishte lakuar prej vitesh në media për lirimet e të dënuarve për jetë. Me urdhër të SPAK, Enkelejda Hoxha u arrestua bashkë me 9 persona të tjerë më 11 shkurt me akuzën e korrupsionit.
Ata u akuzuan se kishin ngritur një skemë përmes të cilës ulnin dënimet ose lironin nga burgu të dënuar për vepra të rënda penale kundrejt parave.
