Mbi 30 punonjës të Ndërmarrjes së Pastrimit për zonat rurale në bashkinë e Fierit protestuan të hënën dhe njoftuan grevë pa afat, ndërsa kërkojnë rritje page dhe kushte më të mira pune. Ata thanë se punojnë në kushte të vështira pa mjete dhe se i mbledhin mbetjet me krahë.
“Ne protestojmë sot për ngritjen e rrogave. Kemi rënë në një pikë të gjithë, se bashkia ngriti rrogat për drejtorat dhe punonjësit e pastrimit i la në rrugë,” tha Petrit Dule, njëri nga punonjësit protestues.
Ndërmarrja e Pastrimit në bashkinë e Fierit ka 150 punonjës që paguhen me pagën minimale prej 40,100 (bruto) lekësh, por brigada e pastrimit të zonave rurale punon në kushte të vështira për shkak të mungesës së mjeteve dhe heqjes së koshave në zonat rurale.
Dule i tha BIRN se 1/3 e rrogës i shkon për transportin, pasi banon në Frakull të Madhe. “Shteti të ndërhyjë menjëherë, pse pagën e tyre e ngritën dhe ne jo?”, pyet ai.
Zyrtarët e bashkisë së Fierit mohuan problemet dhe pretenduan se kishin bërë një rritje page prej 2 mijë lekësh në muajin korrik. Një përgjegjës i Ndërmarrjes së Pastrimit, që foli në kushtet e anonimatit u ankua se protesta ishte e panjoftuar dhe la të kuptohej se grevistët do të zëvendësoheshin.
“Është e vështirë të rrisim pagat tani. Ata ndalën punën dhe ne na duhet të gjejmë punonjës të tjerë. Rritja e pagave parashikohet në buxhet, nuk bëhet menjëherë”, tha ai.
Megjithatë, punonjësit e pastrimit ankohen jo vetëm për pagat e ulëta, por edhe për shkeljen e të drejtave të tyre në punë.
“Lejet vjetore nuk na i japin. Kisha gruan sëmurë në spital dhe më takonte me ligj të merrja leje, nuk ma dhanë,” tha Enver Liçaj, punonjës i ndërmarrjes.
Kjo brigadë pastrimi iu bashkua Ndërmarrjes së Pastrimit të bashkisë 5 vjet më parë për menaxhinin e mbetjeve në zonat rurale. Të gjithë punonjësit janë nga fshatrat e bashkisë së Fierit.
Petrit Dule thotë se ata punojnë të shtunave, por nuk paguhen shtesë për punën në ditë pushimi. “Nuk na i paguajnë të shtunat, punojmë pa lekë për qeverinë, makina është pa shkarkuese, skrep nuk ka, punojmë me krahë, përndryshe të heqin nga puna,” tha ai.
Një tjetër punëtor, Mentor Kazanxhiu, tha se ata punonin natën dhe në kushte të vështira dhe se nuk do e ndalonin grevën pa iu plotësuar kushtet.
Greva pa afat e punonjësve të pastrimit pritet të rëndojë edhe më tej situatën e mbledhjes së mbetjeve në zonat rurale të Fierit, pas një vendimi të mëparshëm për heqjen e koshave dhe detyrimin e banorëve që t’i nxjerrin dy herë në javë mbetjet.
“Unë jam në punë, nuk e arrij dot orën kur duhet të nxjerr mbetjet, kështu që jam i detyruar t’i hedh në rrugë”, tha një banor i Dërmënasit
Qeveria ka shpenzuar miliona euro për të rregulluar menaxhimin e mbetjeve në zonën e Fierit, duke ndërtuar një incenerator që nuk punon përmes asaj që njihet si afera e inceneratorëve. Këto miliona të shpenzuara nuk i kanë dhënë zgjidhje problemit.
/reporter.al/
Discussion about this post