Pedagogët janë mbledhur paraditen e sotme në protestë te Universiteti Politeknik i Tiranës. Protesta kanë nisur prej orës 11:00 dhe numër i madh pedagogësh kanë nisur të mblidhen para kësaj godine.
I pari që mori fjalën ishte pedagogu Aleksander Petre i Shkencave të Natyrës. Ai zbuloi mes të tjerash një bisedë që ministrja e Arsimit, Evis Kushi ka bërë me kolegë të tij, ku si fillim kishte pranuar kërkesat e pedagogëve, por në fund të bisedës kishte thënë se; nuk ka lekë.
Gjithashtu, ata i vendosën ultimatum kryeministrit se nëse kërkesat nuk plotësohen, më datë 17 nuk nisin mësimin.
“Shkencat luajnë me numrat. Numrat i bëjmë shifra dhe shifrat flasin. Ministrja shkoi sot në Universitetin Bujqësor. Ajo tha se; kërkesa tuaja janë minimaliste. Na tha; ‘unë jam si ju, se jam pedagoge, jam si ju dhe punoj për ju. Do të realizojmë atë që keni thënë’. Por në fund tha; ‘nuk ka lekë!’. Ne i thamë faleminderit. I thamë se radhën tjetër do takohemi përballë, me kamerat dhe në prani të Ramës. S’dua të besoj as gojët e liga. Ngrita kokën se mos shikoja ndonjë nga satelitët. 50% rritje rrogë kemi kërkuar. Zoti kryeministër ndoshta nuk di të loz me numrat si ne të shkencave, por mund ta bëjë 49- 1 është i mirëpritur. Ne 20 ditët pritëm, por i themi kryeministrit se në datë 17 ne nuk do të hymë në auditorë për të filluar vitin e ri shkollor. Ndoshta e vutë re kur vinit se podiumin e ulëm këtu poshtë, sepse këtu jemi të gjithë njësoj”, tha ai.
Protesta është konceptuar të mbahet në formën e një forumi ndërkohë që para universitetit Politeknik është vendosur edhe një podium për mbajtjen e fjalës nga ana e pjesëmarrësve.
Discussion about this post