Kërkon të dalë nga regjimi 41 bis, Gjykata e Lartë rikthen për gjykim çështjen e Emiljano Shullazit

Rikthehet për gjykim në Apelin e Posaçëm, ankimimi i bërë nga Emiljano Shullazi kundër qëndrimit të tij në regjimin 41bis. Tashmë çështja do të rikthehet në Apelin e Posaçëm me një trupë gjykuese të re, që do të vendosë nëse Shullazi duhet të vazhdojë të qëndrojë në 41 bis apo duhet të dalë nga aty dhe të dërgohet në një qeli të zakonshme.
Pas 83 seancash gjyqësore të zhvilluara në dy vite Gjykata e Posaçme e Apelit dënoi me vendim të formës së prerë me 55 vite burg Emiliano Shullazin dhe grupin e tij, nën akuzën e gjobëvënies dhe krijim të grupit të strukturuar kriminal.
Vetë Shullazi është dënuar me 14 vite burg, me 12 vite burg Gilmando Danin, me 10 vite Endrit Qyqja, Indrit Zela me 10 vite dhe me 9 vite burg Blerim Shullazi.
Krahas të tjerave, Shullazi vijon të jetë në hetim nga Prokuroria e Posaçme për akuzën e “Vrasjes në rrethana cilësuese” të Vajdim Lamajt dhe Klodian Saliut, ngjarje e cila ka ndodhur në shkurt të vitit 2005 në kryeqytet.
Kërkesa e Shullazit
Emiljano Shullazi duket se nuk është më në gjendje ta përballojë regjimin e ashpër “41 bis”. Pas më shumë se një viti në izolim, ai i është drejtuar me rekurs Gjykatës së Lartë për të dalë nga regjimi special. Ai kërkon që vendimi i vitit 2019 i ministrit të Drejtësisë të shfuqizohet dhe ai të qëndrojë në qeli të zakonshme me të burgosurit e tjerë.
Të dënuarit e parë u futën në qelitë e izolimit në ditën e parë të gushtit të vitit 2020. Emiljano Shullazi, Blerim Shullazi, Gilmando Dani, Endrit Zela dhe Endrit Qyqja u futën në qelitë e izolimit sipas rregullave, pas deklaratës së drejtuesve më të lartë të shtetit për nisjen e regjimit special.
Sakaq, kjo është mundësia e fundit e Shullazit për të dalë nga “41 bis”, pasi gjykata e shkallës së parë dhe ajo e apelit e kanë rrëzuar rekursin e tij, ndërsa fatin e tij në vijim do ta vendosë Gjykata e Lartë.
Në regjimin special 41 bis futen të gjithë të dënuarit që kanë rrezikshmëri të lartë dhe pavarësisht burgosjes në qeli të zakonshme ruajnë kontaktet me jashtë dhe urdhërojnë krime të tjera.