Këshilli i Mandateve dhe Imuniteteve do të vijojë pasditen e sotme mbledhjen për shqyrtimin e kërkesës së SPAK që kërkon autorizim nga Kuvendi për arrestimin e deputetit Arben Ahmetaj.
Në seancën e sotme pritet të avokatët e Arben Ahmetajt, Henrik Ligori dhe Ardian Visha të paraqesin argumentet e tyre duke kundërshtuar ato të SPAK ndaj ish-zv.Kryeministrit. Më pas seanca mund të vijojë me pyetje përgjigje.
Një ditë më parë Këshilli u njoh në mënyrë të hollësishme nga SPAK lidhur me faktet dhe provat që Prokuroria Speciale bazon kërkesën për arrestimin e ish-zv.Kryeministrit.
Kreu i SPAK, Altin Dumani, tha se është i bindur në kërkesën për arrestimin e Ahmetajt, ndërsa mohoi që Prokuroria Speciale të veprojë me regji politike.
Deputetët e opozitës, Ervin Salianji dhe Gazment Bardhi, kërkuan të dhëna nga SPAK nëse në hetim janë Edi Rama dhe Erion Veliaj, por prokurorët thanë se nuk mund të flasin për çështje që konsiderohen si secret hetimor.
Këshilli i Mandateve në përfundim të seancës do të vendosë nëse do të dalë me një apo me dy raporte, që i paraqiten seancës. Nuk dihet ende nëse socialistët do të mbështesin ose jo kërkesën e SPAK për arrestimin e Ahmetajt, por opozita u shpreh pro kërkesës së paraqitur nga Dumani.
Referuar burimeve nga Kuvendi pritet që raporti në Kuvend të paraqitet javën e ardhshme, ndoshta ditën e hënë, në një seancë të jashtëzakonshme.
Discussion about this post