Tensionet mes kreut të PD, Lulzim Basha dhe ish-kryeministrit Sali Berisha duket se janë më të forta se kurrë, pas mbledhje së Kuvendit të Berishës ditën e shtunë.
Ndonëse Komisioni i Rithemelimit që doli nga Kuvendi e konsideroi nul mbledhjes e Këshillit Kombëtar, Basha ka reaguar duke i dërguar një mesazh anëtarëve të këtij Këshilli.
Teksa i njofton se mbledhja do mbahet në orën 15:00, Basha thekson se askush nuk do të marrë peng PD, përfshirë këtu edhe ish-kryeministrin.
“Sot Këshilli Kombëtar mblidhet në ora 15:00 për të marrë vendime të rëndësishme për të ardhmen e Partisë Demokratike. PD nuk do të mbahet peng dhe nuk do të tërhiqet zvarrë nga askush! As nga ai që sot po rrezikon të ardhmen e demokratëve për interesin e tij personal, në luftë të hapur me SHBA. Askush, përfshirë Sali Berishën, nuk do të ketë shansin të kërcënojë demokratët në shtëpinë e tyre. PD që u themelua si shtëpia e lirisë, nuk do të shndërrohet në bunker për askënd, as sot as kurrë. Ne do vazhdojmë të çliruar dhe të vendosur betejën tonë kundër regjimit të Edi Ramës për ta sjellë në pushtet Partinë Demokratike, që është shpresa e vetme e shqiptarëve për të ardhmen dhe për ndryshim”, shkruan Basha.
Më herët, Komisioni i Rithemelimit të PD, i dalë nga Kuvendi i Berishës, ftoi anëtarët e Këshillit Kombëtar të bojkotojnë mbledhjen e thirrur nga Basha, pasi sipas tyre Kuvendi votoi shkarkimin e tij dhe takimi është i paligjshëm.
Discussion about this post