Deputeti i Partisë Demokratike, Ervin Salianji e ka konsideruar si tallje nismën e Këshillimit Kombëtar të kryeministrit Edi Rama, nismë që supozohet të marrë mendim e qytetarëve për situata të caktuara.
Nga foltorja e Kuvendit, Salianji tha se kjo është një tallje ekstreme, ndërsa ironizon kur thotë se halli më i madh që ka qeveria është legalizimi i kanabisit.
“Edi Rama del dhe thatë me një tallje ekstreme për këshillim kombëtar e quan. Del hapur si një autokrat tjetër që atë që thotë populli e bën partia. Po zgjedh të tallet me qytetarët shqiptarë. Në gjithë këtë situatë shqetësimi më i madh i qeverisë është: a janë dakord shqiptarët për tu legalizuar kanabisi. Kjo është një ndër pyetjet e kryeministrit”, tha ai.
Fjalën e tij e përfundoi me Sali Berishën, që sipas Salianjit është shpallur non grata dhe nuk vjen asnjë ditë në Kuvend, ku u shpreh se ndarja nga e shkuara është thelbësore.
“Është nisur një betejë për një person që është shpallur non grata dhe nuk ka ardhur asnjë ditë në parlament. Këta që janë përgjegjësit e 30 viteve dhe tani na shfaqen si shpëtimtarë. Prandaj qytetarët shqiptarë janë të qartë për t’u ndarë njëherë e mirë nga e shkuara që nis këtu dhe përfundon në disa foltore të tjera”, u shpreh ai.
Ndër të tjera, ai ngriti dhe shqetësimin për ngjarjet e ditëve të fundit në vend, ku iu referua raporteve ndërkombëtare, duke i cilësuar si lajme të zeza.
Discussion about this post