Shtëpia e Bardhë ka bërë të ditur se këshilltari i Sigurisë Kombëtare në Shtëpinë e Bardhë, Jake Sullivan zhvilloi një bisedë telefonike këtë të enjte me kryeministrin Edi Rama. Bëhet e ditur se Sullivan ka shprehur mbështetjen e Shteteve të Bashkuara pas sulmit kibernetik të Iranit më 15 korrik.
Ata u angazhuan të vazhdojnë të punojnë së bashku në përpjekjet e Shqipërisë për korrigjimin dhe masat e sigurisë kibernetike. Ndër të tjera, Sullivan shprehu vlerësimin për pritjen bujare nga Shqipëria të shtetasve afganë që kanë ikur nga Afganistani, si dhe u diskutua partneriteti mes dy vendeve për çështjet rajonale dhe globale, duke përfshirë NATO-n.
Kujtojmë se kryeministri Edi Rama kërkoi një ditë më parë që stafi diplomatik i ambasadës së Republikës Islamike të Iranit të largohet brenda 24 orëve nga Shqipëria. Gjatë një fjalimi të publikuar në rrjetet sociale, Rama deklaroi se ky vendim i Këshillit të Ministrave, vjen pasi u zbulua se pas sulmit kibernetik të 15 korrikut, qëndron Republika Islamike e Iranit.
Discussion about this post