KFOR-i rrëzoi Serbinë? Tahiri: Nuk iu ka pëlqyer përgjigja…

KFOR-i ia ktheu një ditë më parë përgjigje kërkesës së Serbisë për të dërguar 1.000 ushtarë dhe policë në veriun e Kosovës.

Përfaqësuesit e Shtabit të Përgjithshëm të Ushtrisë së Serbisë pohuan se e kanë marrë shkresën e misionit paqeruajtës të NATO-s, por asnjëra palë nuk tregoi se çfarë përmbante ajo.

Ministria serbe e mbrojtjes rrëfeu vetëm se përgjigja iu kalua përfaqësuesve të Komisionit për zbatimin e Marrëveshjes teknike ushtarake të premten në pikën kufitare të Merdares mes Kosovës e Serbisë, dhe shtoi se dokumenti iu dorëzua presidentit serb, Aleksandar Vuçiç.

Ish kryenegociatorja e dialogut Prishtinë-Beograd, Edita Tahiri pretendon se Serbisë nuk i ka pëlqyer përgjigjja e KFOR-it, në të kundërt, argumenton ajo, autoritetet serbe do të kishin nxituar ta bënin publike.

E-maili i ushtrisë serbe, zyrës së KFOR-it i mbërriti mbrëmjen e 15 dhjetorit. Serbia e ngriti pretendimin për dërgimin e pjesëtarëve të forcave të sigurisë si reagim ndaj pranisë së shtuar të Policisë së Kosovës në veri të Kosovës.

Në paraqitjen e një kërkese të tillë, në mesin e një përshkallëzimi të ri të situatës në veri, Beogradi zyrtar i referohej Rezolutës 1244 të Këshillit të Sigurimit të Kombeve të Bashkuara, të vitit 1999. Vuçiçi pohoi megjithatë thuajse menjëherë se gjasat ishin shumë të mëdha që kërkesa serbe, të mos pranohej.