Kina ka përsëritur kërcënimet e saj për të sulmuar Tajvanin dhe ka paralajmëruar se politikanët e huaj, që ndërveprojnë me ishullin vetëqeverisës, po “luajnë me zjarr”.
Zëdhënësi i Zyrës së Kinës për Çështje të Tajvanit tha se shteti ka përsëritur përkushtimin se “do të ruajë sovranitetin dhe integritetin territorial” dhe se “do të prishë planet për pavarësinë e Tajvanit”. Ky ishull vetëqeverisës është ndarë nga Kina më 1949.
“Mbështetja dashakeqe për pavarësinë e Tajvanit midis elementeve anti-Kinë në disa shtete të huaja, është një provokim i qëllimshëm”, tha Ma Xiaoguang gjatë një konference për media.
Kina e sheh Tajvanin si pjesë të saj dhe thotë se duhet të jetë nën kontrollin e Pekinit. Për të arritur këtë qëllim, Kina nuk ka përjashtuar as përdorimin e forcës.
Muajt e fundit, në Tajvan kanë qëndruar politikanë të huaj, përfshirë edhe tashmë ish-kryetaren e Dhomës së Përfaqësuesve të Shteteve të Bashkuara, Nancy Pelosi, por edhe disa politikanë nga Bashkimi Evropian. Këto vizita janë shoqëruar me shfaqjen e forcës nga të dyja palët.
Këtë javë, ushtria e Tajvanit tha se po mban stërvitje që synojnë të sigurojnë publikun për aftësinë e shtetit për t’iu kundërvënë kërcënimeve të Kinës.
“Gjëja më e rëndësishme është që të mbajmë sigurinë në hapësirën ajrore dhe sigurinë kombëtare”, tha lejtnantëkoloneli i forcave ajrore të Tajvanit, Wu Bong-yeng.
Kina është përgjigjur ndaj vizitave të diplomatëve të huaj duke mbajtur stërvitje ushtarake në shkallë të gjerë, që disa i kanë parë si përgatitje për pushtim. Pekini pothuajse në baza ditore dërgon avionë dhe luftanije drejt Tajvanit dhe shpesh ka kaluar edhe vijën prej 160 kilometrash në Ngushticën e Tajvanit që i ndan dy palët./REL
Discussion about this post