Një i ri shqiptar që hyri ilegalisht në Mbretërinë e Bashkuar ka rrëfyer për BBC sesi jeta e tij u bë e “padurueshme” pasi përfundoi duke punuar në një fermë kanabisi.
Ai ishte një nga mbi 12,600 shqiptarët që udhëtuan me gomone drejt Britanisë në vitin 2022, viti kur u regjistrua numri më i lartë i kalimeve përmes Kanalit Anglez.
Shqiptari, i cili ka preferuar të mos identifikohet, u shpreh se se po e ndan historinë e tij për të paralajmëruar të tjerët.Ai rrëfeu se gjeti një trafikant në TikTok, i cili i premtoi ndihmë për të mbërritur në Angli. Pasi udhëtoi me autobus për në Francë, arriti në Dunkirk, ku u nis me gomone drejt Doverit. Kushërinjtë e tij, që ndodheshin tashmë në Mbretërinë e Bashkuar, paguan 3500 paund për ta ndihmuar të kalonte Kanalin Anglez.
Fillimisht, ai u vendos në një hotel, por më pas u largua pa u vënë re për të punuar në një fermë kanabisi.
“Isha në kërkim të një jete më të mirë, për të ndihmuar familjen time, si të gjithë të tjerët që bëjnë këtë rrugë. E dija që kishte rreziqe, por shpresoja të mos isha unë ai i pafati,” tha ai.
Por fati nuk ishte në anën e tij. Ferma e kanabisit ku punonte u grabit dhe për këtë arsye ai nuk mori asnjë pagesë.
Pas kësaj, ai nisi të punonte në ndërtim, por për shkak të statusit të tij të paligjshëm, u detyrua të pranonte një pagë shumë të ulët, që nuk i mbulonte dot shpenzimet e tij dhe ndihmën për familjen në Shqipëri.
Pas pesë muajsh në Britani, ai vendosi të kthehej në atdhe.
“Kisha ëndrra të tjera. Shpresoja të arrija diçka më shumë. Askush nuk dëshiron të largohet nga vendi i tij, nga familja dhe miqtë. Por në Shqipëri është një luftë për mbijetesë dhe nuk kisha asnjë zgjidhje tjetër,” tha ai.
Discussion about this post