EMRI/ Kishte pistoletë në makinë dhe në banesë, arrestohet 30-vjeçari

Një 30-vjeçar në fshatin Cakran të Fierit është arrestuar nga policia pas një aksioni të koduar “Risku” për armëmbajtje pa leje.

Në pranga ka rënë Vjoni Gjoka, të cilit në banesë ju gjetën dhe sekuestruan 2 pistoleta dhe municion luftarak.

Aksioni është pjesë e megaoperacionit në rang kombëtar “Sundimi i ligjit” për goditjen e rasteve të armëmbajtjes.

Njoftimi i policisë

Finalizohet operacioni policor i koduar “Risku”. Sekuestrohen 2 armë zjarri dhe municion luftarak.

Kishte 2 pistoleta, në automjet dhe në banesë, kapet në flagrancë dhe vihet në pranga 30-vjeçari.

Si rezultat i kontrolleve në të gjithë territorin e qarkut, të kryera në bazë të informacioneve nga inteligjenca policore dhe në vijim të megaoperacionit “Sundimi i ligjit”, shërbimet e Komisariatit të Policisë Fier organizuan dhe finalizuan operacionin policor të koduar “Risku”, gjatë të cilit u godit një tjetër rast i posedimit të kundërligjshëm të armëve të zjarrit.

Shërbimet e Policisë, për këtë rast, arrestuan në flagrancë shtetasin V. Gj., 30 vjeç, banues në Vreshtas, pasi nga kontrollet e kryera në automjetin që ky shtetas drejtonte gjatë natës, në fshatin Cakran, dhe në banesën e tij, u gjetën dhe u sekuestruan në cilësinë e provës materiale 2 armë zjarri pistoleta dhe municion luftarak.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme procedurale.