“Klodiana e ndjente se do ta vriste Alfredi”, ja detajet që zbulohen

Detaje të reja vijojnë të publikojnë mediat italiane lidhur me vrasjen e Klodiana Vefas, 36-vjeçares shqiptare, nënë e dy fëmijëve, krim që u krye nga bashkëshorti i saj Alfredi. Ky i fundit u vetëvra me të njëjtën armë disa orë pas krimit që tronditi Italinë.

Një shoqja e viktimës, në një intervistë për “La Nazione”, ka zbuluar detajet, ndërsa e konsideron Alfredin si një njeri të dhunshëm, prej të cilit Klodiana kishte frikë.

Madje ajo zbulon se Alfredi mbante armë, gjë që ia kishte pohuar Kloidiana, ndërsa shprehet se krimi ishte i pritshëm, edhe pse 36-vjeçarja nuk e kishte denoncuar bashkëshortin vrasës.

“Ajo kishte frikë se nëse do ta bënte denoncimin ai do t’i lëndonte fëmijët e saj. Ajo mendoi se edhe sikur ta denonconte, asgjë nuk do të ndryshonte. Më thoshte se ai gjithsesi do të bëjë çfarë të dojë. A e dini si ishte ajo?

Ajo donte të ishte e lumtur, po përpiqej me të gjitha forcat. Kishte gjetur një person me të cilin ndihej rehat”, shprehet shoqja e Klodianës.

Në vijim, për median italiane, ajo tregon se Klodiana e ndjeu se bashkëshorti do e vriste.

“Ajo nuk ma tha kurrë hapur, por një herë ma bëri të qartë se kishte armë, duke shtuar një fjali Tani po më mbaron koha”, shprehet e shoqja e viktimës, duke nxjerrë kështu edhe sekretin e shoqes që saj që u ekzekutua me tre të shtëna.

Në vijim ajo thekson se nëse do të kthehej pas në kohë, do të denonconte në polici Alfredin, edhe pse këtë gjë nuk e dëshironte aspak Klodiana.

“As unë dhe as partneri i saj nuk kishim dëshirë të shkonim kundër dëshirës së saj. Kemi këmbëngulur shumë. U përpoqëm ta bindnim në çdo mënyrë. Por në fund ajo na e preu duke thënë: Ne jemi shqiptarë, nuk e kuptoni. E kemi respektuar deri në fund mendimin e saj”, shprehet shoqja e Klodianës.

Klodiana Vefa dhe bashkëshorti i saj kishin mosmarrëveshje dhe sipas raportimeve ishin në prag të divorcit. Alfredi, sipas raportimeve ishte xheloz, çka duket se kishte shkaktuar edhe përplasjet në çift.

Bashkëshorti vrasës nuk jetonte me Klodianën, por ditën e ngjarjes kishte shkuar në banesën e saj, ku edhe fillimisht kishin debatuar dhe më pas ndodhi krimi i rëndë. Pas ngjarjes, Alfredi u largua nga vendi i ngjarjes dhe u shpall në kërkim nga autoritetet italiane. Më pas ai u gjet i vrarë me të njëjtën armë krimi që qëlloi mbi Klodianën.