Ndeshje pas ndeshje, Liverpool i Jurgen Klopp po fillon ta rimmarë veten me këtë gjë që reflektohet në renditjen e Premier League. Pas 32 ndeshjesh, “The Reds” janë në vendin e 7-të, me 53 pikë të grumbulluara dhe janë bërë pjesë e garës së “ethshme” për një vend në kupat e Europës (për momentin ndodhen 6 pikë larg Championsit).
Mirëpo, me garën për hyrjen në të treja kompeticionet ende të hapur, trajneri Jurgen Klopp nuk ka bërë dallime mes kompeticioneve dhe një gjë të tillë e tha në konferencën për shtyp të zhvilluar ditën e sotme në prag të duelit të së dielës ndaj Tottenham Hotspur.
Gjermani tha gjatë konferencës se ky sezon i ka mësuar shumë, teksa shtoi se do të përpiqet që djemtë e tij të dhurojnë futboll të bukur, si në Champions por edhe në Europa League.
“Ne do të marrim atë që marrim. Natyrisht që nuk e prisnim, por ky sezon na ka mësuar disa gjëra. Nëse është Europa League, ne do të luajmë në Europa League.
Dua të luaj futbollin më të mirë të mundshëm. Duhet të jemi të fokusuar në lojë. Ajo që do të ndodhë në javët në vijim do të jetë shumë e rëndësishme për sezonin e ardhshëm”,- tha trajneri gjerman gjatë konferencës për mediat.
Discussion about this post