Këshilli i Lartë i Prokurorisë ka dalë kundër kryeministrit Edi Rama duke zgjedhur në krye të SPAK prokurorin Altin Dumani, dhe jo Edvin Kondilin që thuhej se ishte i preferuari i kreut të qeverisë.
Dumani mori pesë vota nga procesi i votimit që u zhvillua në Këshillin e Lartë të Prokurorisë (KLP). Kandidati tjetër, Edvin Kondili mori 4 vota, ndërsa Adnan Xholi mori vetëm një votë. Dumani pason në këtë post Arben Krajën.
Adnan Xholi, Altin Dumani dhe Edvin Kondili shpalosën platformat e tyre ditën e sotme para KLP, ndërsa për të shmangur cënueshmërinë, procesi u monitorua nga ambasada e SHBA, OPDAT, BE dhe kryeprokurori Olsian Çela.
I pari që u intervistua nga KLP ishte Adnan Xholi i cili tha se ai do të çojë para drejtësinë jo mbi bazën e opinioneve, por mbi bazën e fakteve. Në të njëjtën linjë ishte dhe prokurori Altin Dumani, i cili tha se në punën e tij nuk kanë shumë rëndësi emrat, por faktet.
I fundit u mor në pyetje kandidati Edvin Kondili, i cili deklaroi se do të angazhohej në luftën kundër krimit të organizuar dhe korrupsionit që në ditën e parë të marrjes së detyrës nëse do të zgjidhej në krye të SPAK.
Gijotina.com raportoi ditën e djeshme se disa ditë para zgjedhjes së drejtuesit të prokurorisë më të rëndësishme të vendit, ka pasur një përplasje mes kryeministrit Edi Rama dhe ambasadores amerikane Yuri Kim pasi dyshohet se janë përplasur për emrin që do të drejtojë Prokurorinë e Posaçme.
Rama, siç është raportuar në media, donte në krye të SPAK të preferuarin e tij, Edvin Kondili. Ambasadorja nga ana tjetër thuhet se ka lobuar fuqimisht që këtë post ta marrë Altin Dumani, dhe vetëm sot ky i fundit u emërua kreu i ri i SPAK.
Discussion about this post