Këshilli i Lartë i Prokurorisë ka nisur seancën për zgjedhjen e kreut të ri të SPAK, megjithëse duhet thënë se procesi mbetet vetëm formal sa kohë që kreu i qeverisë e ka përzgjedhur tashmë të preferuarin e tij.
Adnand Xholi, Altin Dumani dhe Edvin Kondili do të shpalosin platformat e tyre, ndërsa për të shmangur cënueshmërinë, procesi do të monitorohet nga ambasada e SHBA, OPDAT, BE dhe kryeprokurori Olsian Çela
Kandidati Adnant Xholi deklaroi se kjo prokurori është bërë efektive dhe është e konsoliduar falë punës dhe ndihmës së ndërkombëtarëve.
“Plotësoj kriteret e KLP për tu ngritur në detyrën e drejtuesit, me bindjen se kam aftësinë për të drejtuar SPAK. Nuk kam asnjë konflikt interesi me ndonjë nga anëtarët e KLP. Kam mbi 24 vite eksperiencë, karriera ka pasur rritje të vazhdueshme. E kam nisur nga roli bazë deri në ngjitjen e shkallëve të karrierës. Drejtuesi ka rolin që tërheq të gjithë trupën në një betejë. Çdo lloj prokurori i Prokurorisë së Posaçme duke respektuar ligjin dhe Kushtetutën do ketë mbështetjen time. Unë do vë në dispozicion të gjithë bagazhin tim dhe eksperiencën drejtuese për mbi 13 vite si drejtues, në hetimin e çështjeve të krimit të organizuar dhe korrupsionit”, tha Xholi.
Ditë para zgjedhjes së drejtuesit të prokurorisë më të rëndësishme të vendit, ka pasur një përplasje mes kryeministrit Edi Rama dhe ambasadores amerikane Yuri Kim pasi dyshohet se janë përplasur për emrin që do të drejtojë Prokurorinë e Posaçme.
Rama, siç është raportuar në media, do të vendosë në krye të SPAK të preferuarin e tij, Edvin Kondili. Ambasadorja nga ana tjetër thuhet se ka lobuar fuqimisht që këtë post ta marrë Altin Dumani.
Megjithatë, duket se Rama ka arritur të fitojë betejën. “Gijotina.com” lajmëroi dje se kryeministri Edi Rama i ka rregulluar punët në mënyrë që Kondili të zgjidhet në krye të Prokurorisë së Posaçme kundër Korrupsionit dhe Krimit të Organizuar.
Discussion about this post