Këshilli i Lartë i Prokurorisë do të nisë këtë të mërkurë procedurat për zgjedhjen e drejtuesit të ri të Prokurorisë së Posaçme, pasi mandati i kreut aktual, Altin Dumani, përfundon më 19 dhjetor 2025. Sipas parashikimeve ligjore, procesi për zgjedhjen e kreut të ri të organit të akuzës nis tre muaj përpara mbarimit të mandatit.
Mbledhja do të nisë në orën 10:00 dhe do të zgjasë rreth 90 minuta. Përveç anëtarëve të Këshillit, të pranishëm do të jenë përfaqësues nga Prokuroria e Përgjithshme, Ministria e Drejtësisë, projekti Eu4Justice dhe programi OPDAT. Media është gjithashtu e ftuar të ndjekë seancën.
Në rend dite është parashikuar miratimi i procesverbalit të mbledhjes së 4 shtatorit, diskutimi dhe miratimi i projektvendimit për shpalljen e vendit vakant në krye të SPAK, si dhe vlerësimi etik e profesional për tre prokurorë: Françesk Ganaj, Ermira Manelli dhe Hysni Mulaj.
Prokurorët e Posaçëm që aspirojë për postin e kreut të SPAK duhet të paraqesin edhe platformat e tyre, duke shpjeguar mënyrën se si synojnë të udhëheqin këtë strukturë. Pas fazës së prezantimit të platformave dhe intervistave publike, KLP do të zhvillojë votimin, nga i cili do të shpallet fitues kandidati që merr më shumë vota.
Discussion about this post