Komisioni për Ekonominë dhe Financat miratoi ditën e sotme projektligjin “Për miratimin e buxhetit faktik të vitit 2020”, i cili është shoqëruar me një sërë debatesh dhe kritikash nga të pranishmit. Gjatë prezantimit të projektbuxheti kreu i Kontrollit të Lartë të Shtetit, Arben Shehu, ka treguar një sërë shkeljesh të gjetura nga auditimet e bëra. Shehu tha se, gjatë auditimeve janë konstatuar probleme me zbatimin e ligjeve në menaxhimin e fondeve publike dhe rishikimet buxhetore.
“Janë konstatuar 2327 rishikime buxhetore, ndër të cilat 442 janë bërë në kundërshtim me ligjin pas datës 15 tetor,” tha Shehu. Ai kritikoi gjithashtu se shumë prokurime publike janë hapur pa parashikuar fonde në buxhet. Sipas Shehut, në 2020 duhet të ishin reduktuar projektet me PPP, duke thënë se qeveria nuk po menaxhon dot riskun e tyre dhe se kanë mungesë të theksuar transparence. Shehu tha se problemet financiare në buxhet u thelluan për shkak të PPP-vë
Nga ana tjetër, Ministrja Ibrahimaj tha se pandemia e COVID-19 e vuri qeverinë në një situatë të paparashikuar, duke e detyruar të bëjë disa herë ndryshime në buxhet me anë të akteve normative.
“Rritja ekonomike për vitin 2020 pati një kontraktim vjetor prej 4% kundrejt vitit 2019. Tkurrja ekonomike arriti pikun në tremujorin e dytë prej rreth -11%, ndërsa u rikuperua disi në tremujorin e tretë dhe u rikthye sërish në terren pozitiv në tremujorin e katërt,” tha Ibrahimaj.
Ajo shtoi se deficiti fiskal arriti në 6.8% të Prodhimit të Brendshëm Bruto, ndërsa borxhi publik në 75.7 për qind.
Raporti i KLSH-së u kritikua nga deputeti socialist, Erion Braçe, i cili e konsideroi auditimin e publikuar ‘një kakofoni shifrash”. Ai i kërkoi KLSH-së që të sillte një shifër të dëmit ekonomik të shkaktuar nga institucionet përmes shkeljeve ligjore të konstatuara nga auditimet.
