KLSH mbetet pasiv kundër korrupsionit. Gjatë vitit të kaluar paraqitur janë pranë organit të prokurorisë vetëm 4 kallëzime dhe indicie penale. Në këto dosje implikohen 14 zyrtarë të niveleve të ndryshme, prej të cilëve 4 kanë mbajtur pozicione drejtuese. Të dhënat janë diskutuar në kuadër të projektrezolutës së Kuvendit për aktivitetin e KLSH gjatë vitit 2022, ku megjithatë thuhet se ka “intensifikim të luftës kundër korrupsionit”.
Përkundrejt dëmeve të mëdha financiare, sidomos në fushën e prokurimeve apo taksave, KLSH preferon të bëjë më shumë rekomandime se sa kallëzime penale për shpërdorimet.
Nëse i referohemi raportit vjetor 2022 të KLSH, dëmi ekonomik i shkaktuar nga abuzimet e zyrtarëve është 1 508 739 000 lekë. Ndërkohë 88 513 854 000 lekë janë efekte negative për shkak të parregullsive dhe 107 488 177 000 lekë janë efekte negative në tatime dhe dogana.
Pra, si mundet të reagojë kaq butë KLSH ndaj shkaktarëve të këtyre dëmeve.
Konkretisht, organi më i lartë i kontrollit për këta shkaktarë ka dhënë 352 janë masa për shpërblim dëmi. Në fakt, këto mbeten në kuadër të rekomandimeve dhe harrohen në sirtarët e drejtorëve dhe ministrave.
Duke mos treguar “dhëmbët” e ligjit, kur KLSH-së vetëm llogarit dëmet, zyrtarët vazhdojnë të abuzojnë me buxhetin e shtetit. Me të njëjtin ritëm vazhdojnë shpërdorimet edhe në katërmujorin e parë të këtij viti.
Mbi 2.3 mld lekë është dëmi ekonomik dhe efektet negative për shkak të parregullsive, të shkaktuara në buxhet, nga institucionet publike, në 4 muajt e parë të këtij viti. Konstatimi vjen nga Kontrolli i Lartë i Shtetit, që gjatë periudhës janar – prill 2023 ka zhvilluar auditime në 55 subjekte, duke përfshirë nivele të ndryshme të qeverisjes si: institucione qendrore, ministri dhe agjenci, njësi të vetëqeverisjes vendore, drejtori të përgjithshme të administrimit fiskal, shoqëri aksionare me kapital shtetëror, etj.
Ndërkaq, KLSH ka dhënë me mijëra rekomandime dhe masa disiplinore, por nuk zbatohen. Kjo çështje ka zënë vend në projektrezolutën e Komisionit të Ekonomisë, ku KLSH udhëzohet “Të identifikojë institucionet që rezultojnë me nivelin më të ulët të treguesit të zbatimit të rekomandimeve”.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post