Pas skandalit ku shumë biznese tregtonin ushqime të skaduara dhe nuk ishin kontrolluar nga AKU, ditën e sotme Kontrolli i Lartë i Shteti ka zbuluar një tjetër shkelje nga ky institucion. Nga auditimi rezulton se AKU në shkelje të ligjit ka anuluar ekzekutimin e gjobave ndaj disa kompanive jo të rregullta, duke krijuar në buxhet një gropë të thellë financiare.
Sipas të dhënave, Autoriteti Kombëtar i Ushqimit i ka falur kompanive private rreth 65 milionë lekë gjoba për shkelje ligjore, që duhet t’i kishte vjelë gjatë viteve 2018-2020 viteve të fundit.
Në raportin e publikuar evidentohet se. vetëm për 21 subjekte, Komisioni i Drejtorisë së Përgjithshme të Autoriteti te Ushqimit ka shfuqizuar tërësisht ose pjesërisht gjobat e vendosura nga inspektorët e Tiranës. Falja e këtyre detyrimeve ka sjellë 31. 550. 000 lekë dëme. “Në 21 raste në 31.550.000nga Komisioni pranë DPAKU, janë shfuqizuar tërësisht/pjesërisht gjobat e vendosura nga inspektorët e DRAKU Tiranë, në mungesë të kompetencës ligjore, arsyetimit ligjor dhe jashtë afatit”, thuhet në njoftim. Nga këto 21 raste, për 14 janë shfuqizuar gjobat në mungesë të kompetencës ligjore, 2 prej tyre jashtë afatit”, thuhet në raport.
Gjithashtu, kontrolli ka zbuluar se 5 bizneseve u janë falur gjobat në mungesë të arsyetimit ligjor nga Komisioni i Autoritetit Kombëtar të Ushqimit. Ky institucion ka amnistuar edhe bizneset, çështjet e të cilave kanë qenë në procese gjyqësore.
Ndër të tjera, gjatë kontrollit është evidentuar se për 56 subjekte, AKU e Tiranës dhe Drejtoria e Përgjithshme nuk kanë marrë masat për arkëtimin e gjobave dhe shqyrtimin e ankesave brenda afatit ligjor dhe për pasojë dëmi i shkaktuar shkon deri në rreth 30 milionë lekë. Ndërsa, në 59 raste, procedura e asgjësimit është kryer në kundërshtim me përcaktimet ligjore të bëra, pasi në këto praktika nuk administrohen dokumentet, të cilat vërtetojnë kryerjen e asgjësimit.
Një tjetër gjetje e Kontrollit të Lartë të Shtetit lidhet me faktin se për të njëjtën shkelje janë vendosur gjoba me vlera të ndryshme.
