KLSH ka gjetur disa shkelje në procedurat e prokurimit publik në tenderin për rikonstruksionin e shkollës “14 Nëntori” në Durrës. Sipas auditit, prokurimi duhet të ishte anuluar nga Komisioni i Vlerësimit të Ofertave për shkak të shkeljeve. Nga 7 kompani që kanë marrë pjesë në garë, gjashtë janë skualifikuar për shkak të kritereve.
KLSH thotë se kompania e përzgjedhur duhej skualifikuar duke nënvizuar se bashkimi i operatorëve ka bërë deklarim të rremë të makinerive dhe stafit që disponojnë për kryerjen e punimeve. Fjala është për për kompanitë “Rajli Ndërtim SHPK” dhe “Varaku SHPK”, të cilat sipas të dhënave në QKB janë në pronësi të Enkelejda Gojashit, Lediana Matës dhe Shpëtim Varakut.
Nga verifikimet rezulton se kompania fituese ka lidhur dy kontrata të tjera me Bashkinë Durrës për të njëjtën periudhë dhe kanë paraqitur të njëjtat makineri dhe fuqi punëtore, të cilat mund të kenë ndikuar edhe në cilësinë e kryerjes së punimeve. Në bilancet e operatorëve fitues nuk figurojnë në inventar të gjitha mjetet të cilat kompanitë pretendojnë se i disponojnë dhe mungon bilanci i pagesave të taksave vendore. Në audit rezulton gjithashtu se dokumentet e tenderit janë kryer pa numër protokolli, ka parregullsi në hartimin dhe miratimin e DST, specifikimeve teknike dhe kritereve për kualifikim.
Edhe zbatimi i kontratës është në shkelje, kjo pasi është lidhur me afat 170 ditë dhe është shtyrë me 60 ditë, pasi subjektet kanë paraqitur faturat me vonesë. Në raportin e KLSH thuhet gjithashtu se të gjitha punimet janë kryer vetëm nga njëri prej operatorëve ekonomik çka vërteton se kontrata mes tyre ka qenë vetëm për plotësimin e kritereve të vendosura në DST, duke dëmtuar konkurrencën e drejtë.
