Kur thua ‘Dinamo’, mendja shkon direkt, te Dinamo e Tiranës, skuadra e dytë e Shqipërisë përsa i përket titujve të fituar në Kategorinë Superiore, megjithatë, këtë radhë, fjala është për një tjetër Dinamo, atë të qytetit të bukur gjeorgjian të Batumit.
Dinamo Batumi, emri i kundërshtarit të Tiranës në raundin e parë kualifikues të Europa Conference League, tifozëve shqiptarë vështirë se mund tu thotë gjë. Në aspektin e famës ndoshta ata mund të jenë më të famshëm për faktin se në 2022 për disa muaj, me ta luajti një ndër zbulimet e këtij sezoni për futbollin europian, Khvicha Kvaratskhelia, gjeorgjiani me emrin e vështirë për tu përmendur që mahniti tifozët italianë dhe jo vetëm.
Atë kohë ne 2022 luante me Rubin Kazan në Rusi, por pas pushtimit të Ukrainës në fund marsin e 2022, dhe rregullave të FIFA-s që lejonin lojtarët të largoheshin nga klubet ruse la Rubin Kazan dhe u kthye në atdhe duke shfrytëzuar pikërisht Dinamo Batumi për pjesën e mbetur të sezonit duke u aktivizuar me ta në 11 takime.
Dinamo Batumi nuk është skuadra më e suksesshme gjeorgjiane në një terren ku ligjin e ka bërë Dinamo e Tbilisit, por skuadra e Shehit duhet të bëjë kujdes.
Ata janë një skuadër në formë, aktualisht pas 19 javësh kampionat, kryesojnë renditjen në kampionat me 42 pikë, kanë një grup që vlen 7.88 milionë euro, me diferencë nga Tirana qe kuotohet 4.9 milionë euro dhe mbi te gjitha do të jenë në kulmin e formës fizike në 13 korrik kur të mbërrijnë në Tiranë, me bardheblutë që do t’ju duhet ta vendosin fatin e kualifikimit një javë më pas në ndeshjen e kthimit që luhet në Gjeorgji.
Në krahun e Tiranës natyrisht që është historia më e pasur dhe eksperienca në kompeticionet europiane, megjithatë, ndryshe nga sezoni i kaluar, duhet që kjo eliminatore të trajtohet me seriozitet maksimal dhe jo me mendjen në Dhërmi.
Discussion about this post