Largimi i trajnerit Julen Lopetegui, nga drejtimi i Wolverhampton, vetëm pak ditë përpara startit të kampionatit, alarmoi tifozët e klubit por, drejtuesit nuk humbën kohë duke e gjetur menjëherë zëvendësuesin.
Klubi i Wolverhampton njoftoi të mërkurën, se Gary O’Neil (40 vjeç) do të zëvendësojë teknikun spanjoll të larguar.
Në faqen zyrtare, skuadra që i zhvillon ndeshjet në “Molineux Stadium” konfirmoi ardhjen e O’Neil, një ish-futbollist me mbi 200 ndeshje në Premier League.
Pasi kishte varur këpucët në gozhdë, anglezi hodhi hapat e patë si trajner te Liverpool, ku drejtoi ekipin U23. Ai më vonë shkoi në Bournemouth, ku ai ishte në klub si trajner i dytë, e rrjedhimisht si i përkohshëm dhe kryesor.
Spanjolli Julen Lopetegui u largua nga Wolves, i pakënaqur me fushatën e transferimeve. Vendimi për t’u larguar nga Lopetegui është rezultat i “divergjencave të mendimeve për tema të caktuara”, gjë që bëri që dy palët të preferojnë “një ndërprerje miqësore të kontratës së tij”, thuhet në një deklaratë të klubit.
Në momentin e ardhjes së Lopeteguit në ishull, Wolverhampton kërcënohej me rënie, por tekniku iberik më në fund arriti ta mbante në skenën e parë të futbollit anglez, falë vendit të 13-të të renditur. Tashmë kjo është histori.
Wolverhampton do të debutojë në sezonin e ri të Premier League në një ndeshje në transfertë ndaj Manchester United, të hënën.
Discussion about this post