Një rekord gjigand është vendosur në futbollin elitar europian, me njërin nga klubet më në zë të globit që ka firmosur një kontratë me shifra stratosferike me një kompani veshjesh sportive.
Mançester Junajtid ka siguruar marrëveshjen më të madhe të sponsorizimit të fanellave në historinë e Premier Ligës një ditë më parë, pasi njoftoi një partneritet të ri 10- vjeçar me “Adidas”, kontratë e cila kap vlerën e 900 milionë paundëve.
Marrëveshja e re e zgjat bashkëpunimin e “djajve” me gjigantin gjerman të veshjeve sportive si furnizuesi i tyre zyrtar i veshjeve deri në vitin 2035 dhe garanton një rritje të konsiderueshme financiare nga kontrata e vjetër, duke i sjellë klubit 90 milionë paund në vit.
Burimet e klubit thanë se marrëveshja u jep atyre siguri rreth burimit më të madh të të ardhurave për dekadën e ardhshme, duke përforcuar njëkohësisht stabilitetin financiar të klubit.
Në një deklaratë të klubit thuhej: “Adidas dhe klubi i Mançester Junajtidit janë të kënaqur të njoftojnë zgjatjen e një prej partneriteteve më të rëndësishme në sportin botëror”.
Skuadra e Ten Hag është një nga ekipet më aktive në merkaton e kësaj vere në Angli. Ata e kanë dërguar deri tani shifrën e investimit të tyre në 179 milionë paund, për transferimin e sulmuesit të Atalantës, Rasmus Hojlund, mesfushorit të Çelsit, Maunt si dhe portierit të Interit, Andre Onana.
Discussion about this post